DILI, 13 Abríl 2026 (TATOLI)—Diretór Jerál Sekretária Estadu Formasaun Profisionál no Empregu (SEFOPE), Carlito do Rosário Cabral, informa Autoridade Queesland Police no orgaun diplomate timor iha Austrália deside prolonga loron 90 hodi kontinua buka traballadór timoroan Joel Assa ne’ebé mout no lakon iha tasi área Emerald Beach Coffs Harbour New South Wales (Austrália).
Notísia Relevante: Autoridade Queensland Police Service buka daudaun traballadór timoroan mout iha tasi Austrália
“Ha’u foin mak kontaktu ba adidu traballadór iha Austrália, nune’e informasaun husi adidu ne’e mak tanba seidauk hetan traballadór nia lakon to’o agora ne’e iha kauza barbarak. Kauza ida mak tasi nia ondas boot, seluk tan mak fatuk ruin no fatuk kuak barak, kauza seluk mak deskonfia ikan tubaraun. Ohin, ha’u konfirma katak durante loron 90 sira sei kontinua halo operasaun hodi buka traballadór ne’e no sei halo prologa área kobertura, tamba deskonfia ondas tasi boot bele lori traballadór ne’e sees husi fatin akontesimentu, Diretór Jerál SEFOPE, Carlito do Rosário Cabral, informa ba Agência Tatoli, liuhusi telefónika, ohin.
Nia hateten, Sekretária Estadu Formasaun Profisionál no Empregu (SEFOPE) konsidera traballadór mout iha tasi la’ós “mate” maibé “lakon” tanba to’o agora seidauk hetan..
Mmaske ekipa seguransa sira buka ho ró no helikoptru iha posibilidade bele akontese tuir kauza ne’ebé mensiona ona, entaun sira seidauk bele konsidera traballadór ne’e mate maibé lakon.
Nia mós afirma, loos duni sasin sira ne’e iha duni maibé prosesu ne’e Governu entrega tomak ba iha autoridade polísia Austrália, adidu traballu no embaixada, tanba bainhira akontesimentu iha Austrália otomatikamente lei iha Austrália mak halo prosesu.
“Família mai hasoru tiha ona ha’u, ami ko’alia tiha ona katak Governu nafatin esforsu halo komunikasaun ho adidu traballu no embaixadora, maibé husu ba família traballadór atu kontinua reza no halo tuir kultura atu kulturamentu bele ajuda autoridade sira buka tuir hodi hetan lalais,” nia hateten.
Tamba ne’e, nia mós apelu ba traballadór timoroan sira-ne’ebé ba servisu iha rai-li’ur atu kuidadu-an, foku ba ida-idak nia servisu, labele ba fatin ne’ebé risku hodi fó impaktu negativu ba imi no imi-nia família, loron feriadu bele pasa ferias maibé labele ba fatin ne’ebr risku no kumpre regra traballu nian.
Notísia Relevante: Traballadór timoroan Joel Assa mout iha tasi Coffs Harbour Austrália
Jornalista : Alexandra da Costa
Editór : Cancio Ximenes
