MANUFAHI, 13 Abril 2026 (TATOLI) – Inan isin-rua sira iha Postu Administrativu Fatuberliu, Munisípiu Manufahi, rekoñese katak partu iha maternidade ka unidade saúde sira seguru liu duké partu iha uma, no mós destaka importánsia akompañamentu hosi profisionál saúde sira.
Afirmasaun ne’e hato’o husi Maria Martins no Marta Rosénia, iha marjen inaugurasaun Sentru Kuidadu Emerjénsia Obstétrika no Neonatal-Bázika (KEmON-B) iha Fatuberliu, infraestrutura ida ne’ebé konsiderada sei haforsa resposta ba emerjénsia materna no neonatál iha fatin referidu.
Maria Martins, tinan 31, inan husi oan nain-rua, agora isin-rua ba oan datoluk, ho bebé iha knotak fulan hitu, haktuir ba Tatoli katak, dezde nia oan dahuluk moris iha 2016, nia sempre halo konsulta regulár iha sentru saúde, tanba konsidera importante ba nia saúde no mós ba bebé.
“Durante konsulta, médiku no parteira sira fó atendimentu ho di’ak loos. Sira fó vitamina no mós aimoruk lumbriga nian,” nia hateten.
Iha fatin hanesan, Marta Rosénia, tinan 23, ne’ebé isin-rua ba oan dahuluk ho bebé iha knotak fulan hitu, hateten katak nia halo konsulta kada fulan iha Sentru Saúde hodi simu vitamina no mós rona esplikasaun kona-ba importánsia partus iha unidade saúde.
Joven ne’e dehan nia hetan apoiu husi família no preparada atu partu iha fulan juñu iha maternidade iha Sentru KEmON-B, ne’ebé foin inaugura.
“Partu iha maternidade seguru, tanba iha parteira sira. Partu iha uma iha risku sira ne’ebé bele afeta ha’u-nia saúde no mós bebé,” nia akresenta.
Autoridade saúde lokál sira halo mós kampaña sensibilizasaun komunitária, hodi enkoraja família sira atu hili unidade saúde ba partu no mós ba konsulta pré-natál regulár.
Objetivu husi Sentru KEmON-B mak hamenus risku ne’ebé mosu husi partu iha uma no asegura asesu ba kuidadu maternu no neonatál ho kualidade, nune’e mós kontribui ba redusaun mortalidade inan no labarik iha Munisípiu Manufahi.
Hermelinda Lopes, parteira iha Sentru KEmON-B Fatuberliu, garante fatin referidu iha ekipamentu ne’ebé kompletu no adekuadu hodi garante seguransa ba inan no bebé.
Tuir nia, bainhira iha komplikasaun durante partu, ekipamentu no profisionál saúde sira iha sentru saúde bele halo intervensaun no transfere inan ka bebé ba Ospitál Referénsia ka ba Ospitál Nasionál, karik nesesáriu.
Hermelinda alerta ba perigu sira ne’ebé bele mosu bainhira inan ida partu iha uma.“Raan-fakar barak liu minutu lima, ita bele la konsege salva vida inan nian. No bainhira bebé moris mai la tanis ka dada i’is araska, ida ne’e mós ita bele la konsege salva vida,” nia hateten.
Tanba ne’e, nia husu ba inan isin-rua sira atu kontinua hakbesik ba sentru saúde hodi halo konsulta periódika durante períodu isin-rua, atu bele monitoriza di’ak saúde inan no bebé.
Notísia relevante:n Fatuberliu asesu ona Sentru KEmON-B hodi hamenus mortalidade inan no bebé
Jornalista: Afonso do Rosário
Editora: Isaura Lemos de Deus
