DILI, 14 Abríl 2026 (TATOLI)—Governu Austrália liuhusi programa PARTISIPA entrega (hand over) ekipamentu ba Ministériu Obra Públika (MOP) hodi apoiu prosesu dezenvolvimentu infraestrutura estrada no bee-moos iha área rurál.
Ekipamentus sira-ne’e hamutuk 13 mak hanesan teste ba alkatraun, ekipamentu dulas simentu no rai-henek (moleng) inklui ekipamentu tékniku sira seluk.
Ministru Obra Públikas, Samuel Marçal, hateten ohin loron Governu liuhusi MOP asina tan akordu ho Governu Austrália liuhusi programa PARTISIPA hodi dezenvolve estrada no bee-moos iha área rurál.
“Sira mós asina akordu ho parte UNTL hodi haree ita-nia baze dadus (data base) ne’ebé Governu bele tau prioridade ho planu Governu nian,” Ministru Samuel hateten ba jornalista sira iha nia kna’ar fatin, Kaikoli, ohin.
Ministru ne’e dehan, Governu Austrália ajuda tan ekipamentu balun ba laboratóriu hodi halo teste ba kualidade obra estrada no edifísiu.
Maske materiál sira-ne’e ki’ik maibé nia benfísiu iha atu garante kualidade, tanba hanesan imi haree obra balun halo tiha depois aat fali ne’e kauza tanba laboratóriu menus ekipamentu.
“Ekipamentu sira-ne’e sei destaka ba sukursál (cabang) iha Ainaru, Manufahi, Baukau, inklui munisípiu seluk ne’ebé presiza maibé balun tau iha sentrál Dili,” nia informa.
Embaixadora Austrália, Caitlin Wilson, reforsa tan katak servisu parseria ne’e importante tebes hodi asegura dezenvolvimentu infraetrutura rurál.
“Program PARTISIPA ne’e hanesan parte ida husi Austrália ne’ebé iha programa dezenvolvimentu umana ne’e iha programa oioin, no faze foun mai sira sei foka ba sertór edukasaun, saúde no sosiál jéneru,” nia dehan.
Nia hatutan, kona-ba orsamentu ne’ebé prevee ba ekipamentu sira-ne’e ladún hatene tanba ne’e grande proejetu ka grand project.
Aleinde ne’e, Ministru Samuel relata kona-ba komunidade iha Bidau ne’ebé husu Governu atu konstrui ponte no dalan ba sira atu asesu, Governu haree hela asuntu ne’e maibé seidauk bele implementa tan buat hotu presiza prosesu, entaun sira sei prepara dezenu molok implementa.
“Ha’u mós atu ko’alia kona-ba foin dadauk inundasaun iha aeroportu Internasionál Prezidente Nicolau Lobato, Komoro ne’e la’ós de’it kauza husi drainajen maibé ne’e husi uma ne’ebé kuak. Drainajen iha duni problema depois mak ita haree tanba la’o hakarak ohin ita halo kedas ne’e lae,” nia dehan.
Jornalista : Alexandra da Costa
Editór : Cancio Ximenes
