Autoridade lokál kontinua husu ba Governu hodi avansa ho kontrusaun ponte Gomilafa
DILI, 14 Abríl 2026 (TATOLI) – Autoridade lokál kontinua husu ba Ministériu Obra Públika (MOP) hodi halo lalais konstrusaun foun ba ponte Gomilafa ne’ebé liga Suku Atelari, Postu Administrativu Laga ho Suku Lavateri, Postu Administrativu Baguia, iha munisípiu Baukau.
Administradór Postu Administrativu Baguia, Mário Xavier da Silva, hateten presiza konstrusaun foun fila-fali ponte referida, tanba iha tempu udan iha possibilidade atu kotu fila-fali, tanba ida ne’e dalan úniku ba movimentu transporte públiku husi Baguia ba Baukau no sai mós dalan aternativu ba Postu Administrativu Uatukarbau, Munisípiu Vikeke.
Nia dehan foin lala’is kompañia Norinco International Corporation, ne’ebé responsabiliza ba projetu reabilitasaun estrada iha diresaun Postu Administrativu Laga no Baguia, apoia normaliza ona ponte referida hodi ateru rai no fatuk ba estrutura ponte nian ne’ebé hetan estragu no monu, agora movimentu transporte públiku liuhusi ne’eba lao normál fali ona. Maibe, medida ne’e ho karáter provizóriu.
“Ami hasoru ona MOP, no tuir informasaun sei fó ba enjiñeiru halo dezeñu, tuir mai atu halo prosesu konstrusaun”, Mário Xavier hateten ba Tatoli liuhusi via telefone, ohin.
Kestaun ne’e mós Deputadu husi bankada Kongresu Nasionál Rekonstrusaun Timorense (CNRT, sigla portugés) Anacleto Freitas levanta ona, iha Parlamentu, Segunda ne’e.
Nia dehan foin lala’is halo fiskalizasaun iha baze identifika ponte ida ne’e ho kondisaun grave tebes no presiza intervensaun urjente, tanba ponte ne’e fasilita movimentu transporte públiku ne’ebé liga Baukau ba Baguia, bainhira kotu dalan alternativa seluk laiha.
Ponte referidu konstrui iha tempu okupasaun Indonézia ne’ebé fasilita movimentu transporte públiku, liuliu komunidade hamutuk 11.725 husi Baguia.
Notísia relevante: Kompañia Norinco apoia normaliza ponte Gomilafa iha Baguia
Jornalista: Nelson de Sousa
Editora: Isaura Lemos de Deus
