DILI, 14 Abríl 2026 (TATOLI)—Governu Timor-Leste no Austrália finaliza ona dokumentu Kódigu Mineiru Petróleu (PMC, sigla inglés) ba dezenvolvimentu Greater Sunrise.
Ministru Petróleu no Rekursu Minerál, Francisco da Costa, hateten, finalizasaun dokumentu referidu liuhusi ronda negosiasaun ne’ebé realiza iha fulan-Marsu tinan ne’e.
Nia esplika, iha negoasiaun referida iha dokumentu tolu importante ne’ebé parte rua diskute atu finaliza mak dokumentu Kódigu Mineiru ba Petróleu (PMC), Kontratu Fahe Produsaun no Rejime Fiskál, maibé ekipa foin finaliza uluk mak dokumentu Kódigu Mineiru ba Petróleu.
“Ba dokumentu rua seluk ne’ebé seidauk finaliza daudaun ita-nia ekipa intensivu loos, aban kontinuasaun enkontru ho ekipa husi Austrália nian liuhusi online, kontinua diskute ba asuntu pendente sira ba dokumentu rua ne’e no fulan-Juñu sei iha ronda negosiasaun prezensál nian rua iha Austrália no Timor-Leste. Ita espera katak husi ne’ebá bele finaliza ka besik liután ba konkluzaun husi dokumentu rua seluk”, Francisco da Costa hateten hafoin halo enkontru ho reprezentante Governu Austrália ba Greter Sunrise, Katrina Cooper, Faról, Dili.
Governante ne’e esplika katak dokumentu tolu ne’e importante tenke finaliza iha tinan ne’e, bainhira dokumentu tolu ne’e finaliza ona hakat ba desizaun ba planu úniku konseitu dezenvolvimentu kampu Greater Sunrise.
“Tanba konseitu daudaun ne’e rua ida ba Austrália no ida mai Timor-Leste, entaun ita halo prosesu hotu atu ita bele ba finaliza ida de’it, ita-nia pozisaun mai Timor-Leste”, nia dehan.
Notísia relevante: https://tatoli.tl/2026/03/04/negosiasaun-hodi-finaliza-dokumentu-ba-projetu-greater-sunrise-komesa-semana-nee/
Jornalista: Arminda Fonseca
Editór: Rafael Ximenes de A. Belo
