BOBONARU,15 Abríl 2026 (TATOLI)— Lider komunitária ho dirijente eskola sira identifika ona rai atu hari edifisíu Eskola Ensínu Pre-Eskolar (EPE) Sentru da Paz Hauba, iha suku Maleubu, Postu Administrativu Bobonaru, Munisípiu Bobonaru.
“Rai los hotu ona. Ita identifika ona besik iha eskola EBF nia ne’e. Hein de’it ita submete pedidu ba Ministeriu Edukasaun ou Prezidensia Repúblika, no parte rua ne’e mak kordena malu. Tanba sira mai hare hotu no sukat ona,” Xefe suku Maleubu, Quintiliano Barros, informa ba Tatoli, iha Maliana, Kuarta ne’e.
Iha Tinan kotuk Ministériu Edukasau tau ona prioridade atu konstrui eskola refere, maibé tanba problema laiha rai propriu no rai ne’ebé antes ne’e identifika komunidade rejeita atu oferese, nune’e governu deside seidauk harii to’o agora.
Alende ne’e, Prezidente Repúblika, José Ramos Horta mós foin lalais ne’e hare direita ona kondisaun eskola refere no promete atu rezolve.
Notisia Relevante:Dirijente eskola preokupa kondisaun edefísiu EPE Sentru da Paz Hauba
Parte seluk, Koordenadora eskola EPE Sentru da Paz Hauba, Domingas Moniz, husu ba parte kompetente atu tau prioridade iha planu orsamentu tinan 2026 tanba infraestrutura atuál eskola ne’e a’at no grave tebes.
Hanesan Koordenadora no manorin ida, Domingas sente triste tanba dezde tinan 2008 to’o agora sei kontinua impresta edifisíu sede aldeia antigu ida ne’ebé ho kondisaun fizika atuál la seguru ona ba estudante no manorin sira atu hala’o prosesu Ensinu no aprendizajen loro-loron.
“Kalen dodok hotu ona, entaun uma ne’e kuandu monu tia ami atu ba eskola los iha fatin ida ne’ebé. Ami presiza fatin ida seguru no dook husi komunidade, tanba uma ida agora ami uza ne’e rabat kedas ho oficina no merkadu. Se kuandu bazar ema barak,ema hadi’a motor mós barullu, ita hanorin, koalia ba labarik sira mós la rona malu,” nia dehan.
Enkuantu tuir dadus tinan letivu 2026 totál estudante iha EPE Sentru da Paz Hauba hamutui 60 ho totál manorin nain rua no ida asumi mós kargu hanesan koordenadora eskola.
Jornalista : Sergio da Cruz
Editora : Armandina Moniz
