BOBONARU,08 Abríl 2025 (TATOLI)- Dirijente eskola ho komunidade no líder-komunitaria preokupa kondisaun edefísiu Eskola Ensinu Pre-Eskola (EPE) Sentru da Paz Hauba, suku Male-Ubu,Postu Administrativu Bobonaru, Munisípiu Bobonaru tanba grave tebes ona atu utiliza ba proesesu apredizajen.
Koordenadora EPE Sentru da Paz Hauba, Domingas Bui Letto Moniz, relata maske iha loron 25 fulan-juñu 2024 ne’e, Ministra Edukasaun, Dulce de Jesus Soares, hamutuk ho ekipa halo vizita no haree direita ona kondisaun eskola referidu, maibe to’o agora seidauk iha desizaun ida atu hadi’a kondisaun eskola ne’e.
Notísia Relevante:ME promete hadi’a EPE Sentru da Paz Hauba iha 2025
“Iha momentu ne’ebá sira dehan eskola ida ne’e planu ba iha 2025 tenke-ser halo tanba ami nia kondisaun edifísiu eskola ne’e grave ka a’at loos. Ami hanorin labarik barak, depois fatin klo’ot bo’ok-an la di’ak. Nune’e ami rekomenda se karik tinan ida ne’e labele, entaun tinan 2026 tau prioridade atu hadi’a tiha ami nia eskola ne’e”, dehan Dirijente Eskola ne’e ba Jornalista sira iha kna’ar fatin.
Hanesan Koordenadora no manorin ida, Domingas sente triste tanba dezde tinan 2008 to’o agora sei kontinua impresta edifisíu sede aldeia antigu ida ne’ebé ho kondisaun fizika atuál la seguru ona ba estudante no manorin sira atu hala’o prosesu Ensinu no aprendizajen loro-loron.
Ho kondisaun ne’e, nia afirma iha tempu-udan ho anin mak família sira tauk hodi haruka estudante sira atu mai partisipa prosesu aprendizajen.
“Kuandu udan-ne’e labarik sira nia kadeira ho meza sira bokon hotu, hafoin ami buka fatin ne’ebé maran mak ami hala’o proseus aprendizajen, depois eskola ne’e anin sobu dala ida ona. Ami sosa fali kalen ho ai mak hodi taka fali. Agora ai-rin ida sorin ba ne’e atu monu de’it ona maske ami nia eskola mak a’at, maibé ami nia ensinu no aprendizajen la’o hela”, nia afirma.
Iha fatin hanesan, Carminda dos Santos, Reprezentante Inan-Aman, husu ba Ministériu Edukasaun atu labele reabilta edifisiu eskola referidu tanba kondisaun Infraestrutura atuál iha tempu udan ho anin bele fó ameasa ba estudante no manorin sira nia vida.
“Eskola hanesan ne’e la di’ak ba ami nia-oan sira dalaruma udan sira bokon,depois anin sira ladun seguru iha eskola ne’e liuliu fó ameasa ba labarik sira nia vida,” reprezentante inan-aman ne’e preokupa.
Alende ne’e, Xefe suku Male-Ubu, Quintiliano Barros Fernandes, rekomenda ba Ministériu Edukasaun atu aseleira prosesu reabilitasaun tanba rai ne’ebé Ministra Edukasaun husu atu prepara ne’e identifikadu ona.
“Esforsu sira ne’e, ami halo hotu ona hanesan rai iha ona no entrega rai submete hotu ona ba Diretór Terra no Propriedade Munisípiu Bobonaru, Nune’e husu ba Ministériu Edukasaun atu toma atensaun hodi aselera prosesu hodi fasilita ita nia oan sira atu estuda iha fatin ne’ebé diak”, nia afirma.
Enkuantu tuir dadus tinan letivu 2025 EPE Sentru da Paz Hauba akumula estudante na’in-62 no manorin na’in (2).
Tuir observasaun Ajensía TATOLI,I.P iha terrenu nota katak edifísiu EPE Hauba besik kedas ofisina komunidade nia no iha momentu estudante sira konsumu ai-han merenda eskolar ladun ijiene tanba laiha lutu eskola hodi asegura animál tama-sai livre.
Notísia Relevante:ME planeia halo konstrusaun pakote prototipu eskola iha tinan 2025
Jornalista: Sergio da Cruz
Editór: Florencio Miranda Ximenes
