BOBONARO, 25 juñu 2024 (TATOLI) – Ministra Edukasaun (ME), Dulce de Jesus Soares, tersa ne’e halo vizita ba Eskola Pre-Eskolár (EPE) Sentru da Paz Hauba, suku Maliubu, postu administrativu Boboanaro, munisípiu Bobonaro, hodi haree direta prosesu ensinu aprendizajen no kondisaun infraestrututa eskolár.
Iha vizita ne’e, Ministru Dulce promete tau prioridade iha orsamentu tinan fiskál 2025 atu halo konstrusaun foun, tanba kondisaun fíziku eskola ne’e la seguru ba estudante no manorin sira.
Notísia relevante: ME distribui karteira eskolár 8000-resin ba eskola 100-resin iha semana oin
“Ministériu prontu ona, tama iha planu atu halo konstrusaun iha 2025, maibé rai komunidade tenke ajuda, hatudu hela rai balu, depois ita halo levantamentu, surat sira-ne’e loos hotu, ita harii eskola ba ita-nia oan sira, tanba ida ne’e kuitadu, profesora mós hanorin iha fatin ida la kapaz ba ita-nia oan sira, triste,” nia hateten durante konversa ho manorin sira iha EPE sentru da Paz Hauba.
Koordenadora EPE Sentru da Paz Hauba, Domingas Bui Leto Moniz, agradese no fiar katak Ministériu Edukasaun sei tau duni prioridade hodi rezolve problema referida, tanba durante tinan barak ona empresta de’it sede aldeia ida hodi realiza ensinu aprendizajen ba estudante sira.
“Ami-nia eskola ida-ne’e dezde 2008 até agora, agora ami empresta sede aldeia, tanba edifísiu permanente laiha no hariis-fatin. Ami -nia eskola tempu udan araska, uluk anin pernah loke tiha mak ami taka fali kalen,” nia katak.
Enkuantu Pre-Eskolár Sentru da Paz Hauba, akumula estudante ho totál 62 profesora na’in-rua.
Notísia relevante: Edukasaun Bobonaro koloka profesór 67 ba eskola 43
Jornalista: Sérgio da Cruz
Editór: Evaristo Soares Martins
