iklan

EDUKASAUN, BOBONARO, MUNISÍPIU

Edukasaun Bobonaro koloka profesór 67 ba eskola 43

Edukasaun Bobonaro koloka profesór 67 ba eskola 43

Diresaun servisu Munisipál Edukasaun Bobonaro ko'alia hela ho profesór bolsa kandidatu sira hafoin koloka ba eskola sira. Imajen Tatoli/Sergio da Cruz.

BOBONARO, 27 maiu 2024 (TATOLI)-Diresaun Servisu Munisipál Edukasaun Bobonaro, segunda ne’e koloka profesór bolsa kandidatu na’in-67 ba Ensinu Bázika Filiál (EBF) no Ensinu Báziku Sentrál (EBC, sigla portugés) hamutuk 43 ne’ebé pertense  iha postu administrativu lima hanesan; Atabae, Balibó, Cailaco, Maliana no Bobonaro.

Superintendente Edukasaun Munisipál Bobonaro, Noemia da Silva Manuel Leite, informa manorin hirak-ne’e kolokadu atu hanorin iha área espesialidade sira hanesan lian portugués, tetum, ingles, matemátika, siénsia naturál fízika no seluk tan.

Notisia relevante: ME koloka ona profesór 480 ba eskola 276 iha territóriu tomak

“Ohin ami halo kolokasaun ba profesór ne’ebé selesionadu ba Bolsa kandidatu na’in 67, loloos 68, maibé iha lista mai 67, falta ida ne’e ami sei konfirma ba nasionál tanba fó sai iha nasionál 68, maibé realiza 67 de’it, iha lista mós ami seidauk hetan naran,” nia informa ba jornalista sira iha Maliana.

Superintendente edukasaun ne’e dehan, postu administrativu Lolotoe la hetan kolokasaun profesór tanba eskola sira la tama iha kategoria mais krítika u, husi númeru eskola 27 ne’ebé Diresaun Servisu Munisipál Bobonaro identifika no konsidera mais krítiku.

Nia hatutan, ho kolokasaun profesor bolsa kandidatu bele rezolve ona problema no difikuldade ne’ebé eskola balu enfrenta liuliu menus profesor.

Servisu Edukasaun Munisipál Bobonaro mós koordena ona ho Diretór EBC no koordenadór EBF sira atu buka fatin ba profesór sira hela.

“Ami fiar katak ita-boot sira kualifikadu, tanba selesionadu ba bolsa kandidatu, ha’u hanoin ita-boot sira sei hatudu ezemplu ne’ebé di’ak. Ita-boot sira sei dedika ita-boot sira-nia-an hamutuk husi ita-boot sira-nia dedikasaun ita sei lori jerasaun ida-ne’ebé di’ak ba futuru munisípiu Bobonaro,” nia hateten.

Profesór Angelo Jesus Fátima,nl rekoñese hanesan sidadaun Timor prontu atu kumpri hodi serbí, maibé nia preukupa tanba governu halo kolokasaun sein prepara kondisaun ruma.

“Sira hatene mak koloka ami, maibé oinsá ami-nia hela-fatin, hanesan ha’u mai husi Baucau ne’e, atu hela iha ne’ebé, família laiha ne’e, ami hanorin oinsá, sentru saúde besik ka lae, sira la preukupa ho ida-ne’e,” nia kestiona.

Profesór kolokadu, Bernardo Menezes, preparadu atu hanorin iha eskola Purugua, maski dook malu ho família sira iha munisípiu Baucau hodi moris iha ambiente foun.

“Ha’u seidauk hatene fatin atu ba ne’e, maibé ha’u laiha dúvida ho kolokasaun ne’e, tanba ha’u nudar timoroan, ne’ebé atu ba iha ne’ebé de’it, ha’u sei fó ha’u-nia kaspaidade no dedikasaun tomak,” nia. tenik.

Enkuantu profesór hirak-ne’e sei simu direta husi diretór EBC no koordenador filiál sira ne’ebé konsentra iha eskuadra Polísia Atabae, Balibó, Cailaco no Bobonaro hafoin viajen ba fatin ne’ebé kolokadu.

Notisia relevante: EBC Dom Caileto falta profesór disiplina tolu

Jornalista: Sérgio da Cruz
Editór: Evaristo Soares Martins

iklan
iklan

Leave a Reply

iklan
error: Content is protected !!