EBC Dom Caileto falta profesór disiplina tolu
BOBONARO, 02 fevereiru 2024 (TATOLI) – Ensinu Báziku Sentrál (EBC, sigla portugés) Dom Caileto, ne’ebé lokaliza iha suku Bobonaro Vlla, postu administrativu Bobonaro, munisípiu Bobonaro, daudaun ne’e enfrenta problema falta manorin ba disiplina Ingles, Matemátika no Siénsia Naturál ba estudante terseiru siklu.
Diretór EBC Dom Caileto, Daniel da Cruz, hateten iha tinan letivu 2023 ensinu no aprendizajen la’o ho di’ak, maibé tinan letivu 2024 iha aula balun ba estudante terseiru siklu sira mamuk, relasiona ho professór kontratadu kontratu terminadu.
Notísia relevante: EBC Dom Caileto prenxe valór ezame ho surat-tahan
“Agora daudaun matéria ingles ne’e hosi sétimu-anu to’o nonu-anu ne’e profesór laiha. depois Matemátika ho siénsia Fízika Naturál ne’e mak menus, ne’ebé ami presiza tebes profesór ba matéria tolu ne’e,” nia informa ba jornalista sira iha Bobonaro, sesta ne’e.
Nia subliña, durante ne’e sira labele esforsu buka profesór balu ajuda hanorin tanba la hetan despaxu hosi Ministériu Edukasaun.
Ba kestaun ne’e, nia dehan obrigatóriu profesór balu tenke hanorin la tuir oras letiva ne’ebé hatuur ona iha lei baze edukasaun.
“Tuir lei ne’e profesór ida tenke hanorin 24 pur semana, entaun iha ne’e ha’u-nia profesór na’in-rua Matemátika hosi sétimu-anu (A) ho (B) no oitavu-anu (A) ho (B) profesór ida de’it mak mak hanorin 30 oras pur semana ba Matemátika ho siénsia naturál, ingles nia ne’e mamuk loos de’it, tanba ita atu ba profesór ida hanorin, nia labele foti tanba la’ós ninia área, só ema lisensiatura ingles mak bele,” nia katak.
Alende ne’e ba estudante sira iha segundu siklu mós iha professor na’in-ida, ne’ebé hanorin kintu-anu mós laiha no profesór sestu-anu mós tama ona idade reforma.
Biban ne’e dirijente eskola refere husu ba Ministériu Edukasaun atu aselera projetu rekrutamentu ba profesór foun, liuliu ba matéria importante sira hanesan Ingles, Matemátika no Siénsia Naturál.
“Sé karik izame nasionál mak professor laiha, aban bainrua valór ne’ebé ami atu fó ba edukasaun nasionál ne’e ra’ut de’it iha-ne’ebé, ami mós labele halo milagre, tanba profesór laiha ami labele kria valór ne’e arbiru de’it,” nia preokupa.
Tuir dadus tinan letivu 2024 totál estudante iha EBC Dom Caileto hamutuk 372 ho totál profesór na’in 20.
Notísia relevante: Kondisaun sala aula haat iha EBC Dom Caileto la seguru ba estudante sira
Jornalista: Sérgio da Cruz
Editór: Evaristo Soares Martins
