Kondisaun sala aula haat iha EBC Dom Caileto la seguru ba estudante sira
BOBONARO, 13 dezembru 2022 (TATOLI)-Kondisaun sala aula haat iha Ensinu Báziku Sentrál (EBC, sigla portugés) Dom Caileto, suku Bobonaro Vila, postu administrativu Bobonaro, munisípiu Bobonaro, la seguru ba estudante sira atu tuir prosesu aprendizajen tanba eskola koñesida ho naran Cavalaria 5 Bobonaro ne’e konstrui dezde okupasaun kolonializmu portugés nia tempu.
Diretór EBC Dom Caileto, Daniel da Cruz, informa, durante ne’e prosesu aprendizajen la’o di’ak hela, maibé bainhira estudante sira tama hotu aula laran difikulta manorin sira atu halo esplikasaun ba matéria tanba aula ba estudante oitavuanu ho nonu-anu anu la permite.
Notísia relevante: Diretór Finansa MEJD konsidera eskola iha osan sufisiente responde nesesidade
Nia hatutan, EBC ne’e iha sala aula hitu akomula estudante hosi primeiru to terseiru siklu fahe ba tornu dadeer no lokraik no eskritóriu ida ba profesór sira.
“Uluk diretór sesante no nia gabinete diretiva uza konsensoens ne’e sosa netik triplex no ai-oan ruma mak agora sala boot ne’e ami fahe ba rua ho triplex, entaun estudante sira tama iha sorin mós barulu, sorin mós barulu, se iha sala ida profesor maka ne’e, kondisaun ita la rona malu,” nia informa ba Tatoli, iha kna’ar fatin, tersa ne’e.
Diretór ne’e mós relata, EBC ne’e iha ninia filiál hamutuk sia maibé kondisaun eskola di’ak hela, tanba EBF MaZop no Odelgomo governu konstrui iha tinan 2021 liuhosi projetu komunitária.
Alende problema kona-bá sala aula, eskola ne’e mós hasoru problema laiha livru materia espesifiku sira hanesan matemátika no siénsia naturál, língua portugués, istóriaria jeografia ba estudante sira, liuliu terseiru siklu.
Daniél dehan, maske nia foin asume kargu responsável eskola ne’e durante fulan rua, maibé problema ne’e diretór sesante sira sempre hato’o ba diresaun edukasaun munisipál Bobonaro no Ministériu Edukasaun, Joventude no Desportu to’o agora seidauk iha rezultadu ruma.
“Hau sujere ba Ministériu Edukasaun atu rezolve ami problema falta livru no kondisaun sala aula ladún di’ak ba prosesu aprendizajen, oinsá ba oin ministériu hare saida mak ami hasoru nune’e prosesu aprendizajen ba bele la’o ho di’ak,” nia fó hanoin.
Tuir Observasaun Tatoli iha terrenu nota katak, janela eskritóriu profesór no diretór eskola nia mós didin de’it ho triplex no kalen uzadu. Nune’e mós moru protesaun ba eskola ne’e la seguru.
Ekuantu totál estudante iha EBC Dom Caileto tinan letivu 2022 na’in-421, komposta hosi mane 197, feto 224 no totál profesór na’in-24, permanente 18 no kontratadu neen.
Notísia relevante: Projetu konstrusaun no reabilitasaun infraestrutura eskolár iha Bobonaro atinje 26%
Jornalista: Sérgio da Cruz
Editór: Evaristo Soares Martins
