DILI, 15 Abríl (TATOLI)—Enviadu Espesiál Governu Timor-Leste Asuntu Klimátika, Embaixadór Adão Barbosa, kuarta ne’e, hasoru malu no relata asuntu klimátiku ne’ebé hamahon an bai ha konvensaun Organizasaun Nasun Unida ba Prezidente Repúblika, José Ramos-Horta.
Notísia Relevante: TL hetan orsamentu husi Fundu klimátiku Verde-Projetu Fundu ba Nasaun Menus Dezenvolvidu
Nia hatutan, iha tinan kotuk ONU halo konferénsia ida kona-ba mudasa klimátika no desizaun ikus husi konferénsia ne’e fó mandatu ba Timor-Leste lidera nasaun menus dezenvolvidu iha ONU.
“Iha desizaun konferénsia ne’e fó mandatu ba Timor-Leste atu lidera nasaun menus dezenvolvidu sira iha Organizasaun Nasaun Unida (ONU) nia okos hamutuk nasaun 44. Ida-ne’e mak ha’u mai informa ba ita-nia Prezidente Repúblika,” Embaixadór ne’e hateten ba jornalista sira hafoin ramata enkontru ho Xefe Estadu iha Palásiu Prezidensiál Nicolau Lobato, Bairru Pite.
Asuntu klimátika ne’e hamahan-an ba iha konvensaun Nasaun Unida nian no iha tinan kotuk realiza konferénsia ida, no husi konferénsia ne’e nia implikasaun balun konsege lori mai iha Timor-Leste atu implementa.
Nia infroma, iha 27-30 Abríl 2026 ne’e, sei iha enkontru nivél aas Organizasaun Nasaun Unida (ONU) nian ne’ebé sei ko’alia kona-ba mudansa klimátika, ne’ebé sei envolve no partisipa direita husi Prezidente Repúblika, José Ramos-Horta.
”Ami mós fó informasaun katak, iha enkontru nivél aas ONU ba mudansa klimátika sei envolve ka partisipa husi Prezidente Repúblika nomós Ministériu relevante sira liuliu Ministru Negósiu Estranjeiru no Kooperasaun (MNEK) no membru Governu seluk. Enkontru ne’e hala’o iha Dili no nasaun 44 menus dezenvolvidu sira-nia reprezentante sei mai hotu. Enkontru nivél aas ne’e atu tau hanoin hamutuk oinsá bele lori hanoin sira ba defende iha negosiasaun klimátika ONU nian ne’ebé realiza fulan-Juñu iha nasaun Alemaña,” nia dehan.
Aleinde relata kona-ba servisu sira-ne’e, nia dehan, nia parte husu mós ba Xefe Estadu oinsá bele fó tan forsa polítika diplomasia kle’an liu no oinsá lidera nasaun menus dezenvolvidu sira ba oin ho di’ak.
Atu halo mundansa kona-ba dezenvolvimentu kombate klimátika, tuir nia, Timor-Leste sei esforsu maka’as hodi halo negosiasaun iha mundu globál atu bele hetan apoia barak liutan.
”Dalan ba oin mak lori nasaun menus dezenvolvidu sira-nia naran Timor-Leste sei halo tan negosiasaun iha mundu globál atu nasaun dezenvolvidu sira-ne’ebé mak komprometidu atu fó orsamentu klimátiku ba nasaun menus dezenvolvidu sira no Illa ki’ik-oan sira-ne’ebé mak foin hadi’a an,” nia dehan.
Jornalista : Hortencio Sanchez
Editór : Cancio Ximenes
