DILI, 15 Abríl 2026 (TATOLI)—Primeiru-Ministru (PM), Kay Rala Xanana Gusmão, Kuarta ne’e, hafoin reuniaun Konsellu Ministru iha Palásiu Governu, marka prezensa iha Diresaun Nasionál Servisu Investigasaun Kriminál (DNSIK) Komandu Jerál Polísia Nasionál Timor-Leste (PNTL), Kaikoli.
Xefe Governu ho seguransa husi seguransa pesoál sira to’o iha Kuartel Jerál PNTL tuku 15:40, hetan akompañamentu husi Komandante Jerál Komisáriu, Asistente Polísia Afonso dos Santos no Segunda Komandante, Komisária Asistente Natércia Eufrasia Soares Martins.
Xefe Governu nia prezensa halo membru Polísia sira hakfodak tanba derrepente de’it no PM Xanana hakarak tama kedan ba sala Unidade Polísia Téknika DNSIK.
PM konsege halo enkontru ho Komandante Jerál, Segunda Komandante no Diretór Nasionál Servisu Investigasaun Kriminál, Superintendente Xefe Polísia Joao Belo.
Notísia relevante : PNTL halo buska no apreensaun osan iha armazein ida iha Bidau
Hafoin enkontru, bainhira jornalista konfirma kona-ba prezensa ne’e relasiona ho buska no apreensaun ba osan ne’ebé suspeitadu falsu iha armazen ho na’in xineza iha área Bidau Masau, Aldeia Sagrada Família, Suku Bidau Santa-Ana, Postu Kristu Rei, Munisípiu Dili, Xefe Governu Xanana Gusmão lakohi fó komentáriu no sa’e kedan karreta hodi husik fatin.
Komandante Jerál PNTL, Komisáriu Asistente Polísia Afonso dos Santos, hateten, ohin PM rasik haree ona osan suspeitadu falsu.
“Maibe orientasaun Maun Boot operasaun sei la’o nafatin. Komandante Operasaun mak ne’e Komandante Investigasaun Kriminál ne’ebé Polísia Nasionál Timor-Leste, ha’u fó ona orden para operasaun iha Timor laran tomak kona-ba osan ida-ne’e,” Komisáriu Asistente Afonso dos Santos hateten ba Jornalista sira iha Komandu Jerál PNTL, Kaikoli, Kuarta ne’e.
Nia dehan, nu’udar Komadante Jerál la tolera ba kazu osan suspeitadu falsu ne’e.
“Ida-ne ha’u sei la tolera hanesan Komandante Jerál PNTL. Sé de’it ha’u la tolera ida. Ida-ne’e mak deteta ona Polísia halo kapturasaun no entrega ba Justisa, seluk laiha, ida-ne’e mak ha’u bele hato’o,” nia hato’o.
Jornalista : Natalino Costa
Editora : Julia Chatarina
