DILI, 16 Abríl 2026 (TATOLI)—Komandu Polísia Nasionál Timor-Leste (PNTL) liuhusi Diresaun Nasionál Servisu Investigasaun Kriminál (DNSIK) detein ona suspeitu na’in-tolu ho inisiál WYF, JT no WY ne’ebé suspeitadu envolve iha produsaun osan falsu, iha armazen ho na’in xineza iha área Bidau Masau, Aldeia Sagrada Família, Suku Bidau Santa-Ana, Postu Kristu Rei, Munisípiu Dili.
“Horikalan ita detein balun relasaun ba kazu ne’e depois ohin ami tenta finaliza prosesu hotu antes loraik ita aprezenta ba Tribunál,” Diretór Nasionál Servisu Investigasaun Kriminál, Superintendente Xefe Polísia João Belo, hato’o liuhusi konferénsia imprensa, iha Komandu Jerál PNTL, Kaikoli, Kinta ne’e.
Notísia relevante : PNTL: Osan millaun $4 aprendidu iha armazein Bidau Masau konfirmadu falsu
Nia dehan, Ministériu Públiku mak autoriza halo detensaun ba suspeitu na’in-haat ne’e.
“Buat hothotu ami halo pelu koordenasaun ho Ministériu Públiku,” nia akresenta.
Komandante João hateten, Ministériu Públiku promove ho krime falsifikasaun nota osan.
Jornalista : Natalino Costa
Editora : Julia Chatarina
