BAUKAU, 16 Abríl 2026 (TATOLI) – Bispu Dioseze Baukau, Dom Leandro Maria Alves enkoraja Komandu Polísia Nasionál Timor-Leste (PNTL) atu kontinua fó atensaun sériu ba sirkulasaun atividade ilegál ne’ebé akontese iha Timor-Leste.
Dom Leandro Maria Alves nafatin apoia serbisu PNTL iha-ne’ebé kontinua garante estabilidade seguransa no prevene krime ne’ebé akontese iha territóriu.
“Ita apoiu nafatin atu servisu (PNTL) sira hanesan ne’e. Hala’o di’ak nafatin atu bele asegura ita-nia nasaun husi atividade ilegál sira-ne’ebé mak ita buka atu prevene no hasees husi ita-nia rai,” Dom Leando hateten bainhira simu vizita estrutura Komandu PNTL lidera husi Komandante Jerál, Komisáriu Asistente Afonso dos Santos iha Vila Antiga, Kinta ne’e.
Bispu Dioseze Baukau apresia serbisu PNTL liuhusi Diresaun Nasional Servisu Investigasaun Kriminal Nasional (DNSIK) ne’ebé konsideradu hala’o serbisu ho profisionalizmu ligadu ho kazu apreensaun osan falsu iha iha área Bidau, munisipiu Dili.
Dom Leandro apela ba komunidade hotu atu relata bainhira hetan osan faslu sirkula iha territóriu no husu atu PNTL kontinua prosesa kazu osan falsu ne’ebé parte seguransa halo apreensaun hanesan hala’o investigasaun kle’an ba kazu nune’e hatene motivu husi kazu referida.
“Se ne’e osan falsu hotu de’it mak namkari iha Timor-laran mak ita la toman, ita lakon buat boot tebes, liuliu estraga ita-nia ekonomia”, Dom Leandro Alves akresenta.
Jornalista: Natalino Belo
Editór: Evaristo Soares Martins
