Empreza no ministériu koopera ba produsaun iha área rurál hodi kanaliza ba merkadu
DILI, 16 Abríl (TATOLI)–Diretór Jerál Servisu Kooperativa, Geo Jorge Cardoso, hateten, Ministériu Dezenvolvimentu Abitasaun Komunitária apoiu grupu sira atu hasa’e produsaun iha área rurál shodi kanaliza bá merkadu.
“Parte rua entre Loja Leader no Ministériu asina memorandu ba apoiu produsaun iha área rurál hodi kanaliza ba merkadu sira,” Geo Jorge hato’o ba Jornalista sira hafoin asina nota ba apoiu produsaun iha Gabinete Vise Primeiru Ministru, Ministru Koordenadór Asuntu Sosiál, no Ministru Dezenvolvimentu Rurál no Abitasaun Komunitária, iha Palásiu Governu, Kinta ne’e.
Tuir nia, atu hasa’e produsaun iha área rurál, iha tinan 2024 apoiu ona aldeia hamutuk 70 no iha tinan 2025 aldeia hamutuk 214. Grupu sira-ne’e prodús maibé presiza kanaliza ba merkadu. Ne’ebé foka liubá na’an manu, na’an karau, inklui ba produtu kultura sira seluk.
“Iha tinan 2026, ita planeia tama tan ba aldeia 300 no ministériu sei halo identifikasaun ba aldeia ne’ebé hetan benefísiu, ne’ebé kada aldeia ho grupu hamutuk 502,” nia katak.
Notísia relevante : Komunidade Beko husu MAPPF normaliza irrigasaun hodi hasa’e produsaun hare
Iha fatin hanesan, Diretór ba Produtu Ai-han no Importasaun, Teofilo da Silva, hatutan, agradese tebes ba Governu nia inisiativa tanba bele apoiu ona, nune’e sosa na’in sira no to’os na’in sira mak sosa no kuda.
“Ami agradese tanba ita hetan soberania ai-han, nune’e setór privadu ho asaun sosa produtu lokál. Entaun, husi akordu garante katak produtu ne’ebé iha ita-nia rai-laran barak durante tinan-20. Governu sempre ajuda sosa produtu lokál iha rai-laran 100%, ne’ebé promove liuhusi banner no imprime stiker nomós pájina Facebook sira,” nia katak.
Nia dehan, atu garante kualidade produsaun na’an, tenke iha sala konjeladór hodi uza no garantia nia kualidade bele semana tolu no semana ida.
“Kualidade ne’e importante liu. Sasán ne’ebé mak fa’an iha loja ne’e tenke fa’an iha ne’ebé de’it, importante kualidade di’ak, nia kuantidade tenke boot, nia variedade tenke barak, depoiz nia sustentabilidade tenke iha,” nia tenik.
Jornalista : Osória Marques
Editora : Julia Chatarina
