Janeiru-Marsu: Pasiente ne’ebé mate iha sala emerjénsia maioria moras kardíaku
DILI, 16 Abril 2026 (TATOLI)—Xefe Ermerjénsia Hositál Nasional Guido Valaadres (HNGV), Julia Quintão, hateten durante fulan-Janeiru to’o Marsu ne’e, pasiente ne’ebé mak mate iha sala emerjénsia maioria moras kardíaku.
“Kazu atakasaun fuan ne’e barak. Balun mai hakotu iis iha sala emerjénsia no nia kuantidade barak ne’e ema sira idade 50 ba leten,” Julia Quintão dehan ba jornalista sira iha Hositál Nasionál Guido Valaadres (HNGV), ohin.
Ema-ne’ebé mak atakasaun fuan, tama iha sala emerjénsia ne’ebé pesoál saúde sira atende ne’e, fulan ida ema na’in-20 mak mate.
Husi Janeiru to’o Marsu ne’e, nia dehan, ema ne’ebé mak mate ho atakasaun fuan hamutuk ema na’in-50, no husi ema hirak ne’e balun ne’ebé mak médiku sira-ne’ebé konsege atende mak mate iha sala emerjénsia ne’e hamutuk 27.
“Pasiente balun mai ne’e mate ona iha dalan mak to’o mai iha sala emerjénsia HNGV nian. Entaun, ami tenke husu pasiente nia diagnosa ba familia kadaves pasiente balun problema ho hemodialisis. Balun, familia budu kle’ur iha uma, grave loos ona mak lori mai HNGV, maibé husu tuir balun kardíaku entaun ida-ne’e fatór primeiru halo pasiente hakotu iis iha uma hafoin to’o ospitál,” nia dehan.
Durante fulan tolu (Janeiru to’o Marsu) ne’e, totál pasiente ne’ebé mak tama iha emerjénsia hamutuk 17.772 ne’e kompostu husi iha Janeiru ne’e pasiente feto hamutuk 3.163 no pasiente mane 2.720 ho totál mane no feto hamutuk 5.883.
Iha Fevereiru, nia informa, pasiente feto hamutuk 3.142 no mane hamutuk 2.603 ho totál pasiente mane no feto hamutuk 5.745.
Iha fulan-Marsu, pasiente feto hamutuk 3.363 no mane hamutuk 2.081 ho totál pasiente feto no mane hamutuk 6.144.
“Husi dadus sira-ne’e maioria kazu sira-ne’ebé mai iha emerjénsia ho kazu oioin ka variedade kazu sira-ne’ebé mak mai barak mak atakasaun fuan no mós pasiente ne’ebé mak mai ho infeksaun iha pulmaun sira inklui ho asidente,” nia dehan.
Nia haktuir, kazu dezastre ne’ebé mak tama iha sala emerjénsia iha fulan-Janeiru liuliu asidente ho motorizada ne’e feto na’in- 62 no mane-142, asidente ho karreta ne’e iha feto na’in-lima (5) no mane na’in-ualu (8).
Iha Fevereiru, nia informa, pasiente ho asidente motorizada ne’e iha feto hamutuk 55 no mane hamutuk 129, asidente ho karreta ne’e iha feto na’in-sia (9) no mane na’in-11.
Iha Marsu, nia haktuir, pasiente ho asidente motorizada ne’e iha feto hamutuk 66 no mane 148, asidente ho karreta ne’e iha feto hamutuk na’in-sia (9) no mane hamutuk na’in-13.
Ho nune’e, nia dehan, husi Janeiru to’o Marsu ne’e iha total asidente ho mototizada ho total feto hamutuk 183 no mane 419, asidente ho karreta ne’e feto hamutuk 23 no mane hamutuk 32.
Nia hateten, durante iha sala emerjénsia simu pasiente kada loron ema 100-resin maibé depende ba surtu sira, maibé hotu-hotu akomapaña katak dengue entaun sala emerjénsia bele simu loron ida pasiente 200-resin.
Jornalista : Felicidade Ximenes
Editór : Cancio Ximenes
