DILI, 16 Abríl 2026 (TATOLI)–Juíz Koletivu Tribunál Rekursu (TR), iha Kuarta (17/04) hasai akordaun hodi aplika pena prizaun tinan-haat fulan-neen ba arguidu MSDC ne’ebé soke xoke Zizelma Maria Fátima Gonçalves to’o lakon vida iha zebra cross, iha Loja Funan Buras Delta II nia oin, iha loron 13 Marsu 2025.
Rekursu ne’e aprezenta husi Ministériu Publiku (MP), Prokuradór Rafael Gusmão no Asistente Estáqui Guterres.
Husi rekursu ne’ebé aprezenta, TR avalia no iha loron 26 Marsu 2026, liuhusi númeru NUC:0007/26.TRDIL, Juíz Konselleru TR kompostu husi Juiza Jacinta Corea da Costa hanesan relatora, Juíz Deolindo Dos Santos no Juíza Maria Natercia Gusmão Pereira, julga prosedente no kondena arguidu MCdC hanesan autór materiál ba krime omesidu neglijénsia groseira iha artigu 140 husi Kódigu Penál, ho kastigu prizaun tinan-haat fulan-neen, ne’ebé autór materiál kondús sein karta kondusaun artigu 270, husi Kódigu Penál ho pena prizaun fulan-12.
Maibe ikus mai akumula hodi kondena arguidu ho pena únika tinan-haat fulan-neen iha prizaun no selu mos indemizasaun sivil ho montante $5.000.
“Depois desizaun nee sai, notifika defeza iha loron 01 Abríl 2026,” tuir akordaun ne’ebé Ajénsia TATOLI asesu, Kinta ne’e.
Notísia relevante :Tribunál indefere pedidu husi Asistente Zizelma ba inspesaun iha lokál krime
Rekorda katak, posesu ne’e, iha desizaun dahuluk ba kazu dahuluk, Tribunál Judisiál Primeira Instansia Dili (TJPID) liuhusi Juíz Prosesu José Gonçalves, deside kondena arguidu ho pena prizaun tinan-tolu suspende ba tinan-haat, kondena mós ho indemizasaun sivil $5.000 no aplika mós multa kondusaun sein karta.
Iha momentu ne’ebá, parte Prokuradór ho asistente la aseita ho desizaun TJPID nian hodi halo rekursu ba TR, kontra desizaun TJPID. Iha rekursu ne’e TR hasai desizaun hodi deside halo re-julgamentu ba iha prosesu ne’e.
Iha re-julgamentu, Tribunál konfirma fali deklarsaun husi sasin na’in-rua, haree mós CCTV ne’ebé oferese husi Loja Funan Buras.
Ikus mai, Juíz prosesu deside desizaun ba dala-rua, ne’ebé fó sai iha loron 26 Juñu 2025 hodi kontinua aplika pena prizaun tinan-tolu suspende tinan-haat ba arguidu, indemizasaun sivil $5.000 no pena multa ba kondusaun sein karta, nomós pena alternativu karik arguidu la kumpre desizaun ne’e.
TJPID nia desizaun sai ba dala-rua ona, nune’e MP no Asistente kontinua la konkorda hodi halo rekursu hasoru desizaun.
Jornalista : Natalino Costa
Editora : Julia Chatarina
