Retallista ne’ebé manipula presu kombustível sei prosesa tuir lei
DILI, 16 Abríl 2026 (TATOLI)—Ministru Petróleu no Rekursu Minerál, Francisco da Costa, apela ba konsumidór sira-ne’ebé deteta hetan retallista sira-ne’ebé manipula presu kombustível bele informa ba parte relevante hodi prosesa tuir lei ka dalan legál.
Notísia Relevante: Retallista balun hahú implementa folin kombustível tuir presu padraun Governu
Nia hatutan foin daudaun ne’e Governu Konstitusionál da-sia (IX) liuhusi reuniaun Konsellu Ministru (KM) aprova ona padraun presu ba kombustível, signifika retallista sira labele faan kombustível ninia presu liu fali padraun ne’ebé iha.
“Se imi hetan Pertamina balun hasa’e mina nia folin no hamenus volume mina nian, bele hasai fotográfia, retallitas nia naran no fatin iha ne’ebé, relata ba ANP ka PNTL. Se lae, mai iha ami-nia edifísiu atu hodi relata asuntu ne’e,” Ministru ne’e informa ba jornalista sira iha Palásiu Governu ohin.
Atu nune’e, nia dehan, Governu liuhusi PNTL bele prosesa tuir dalan legál tanba dekretu-lei klaru ona kona-ba padraun presu mina nian no ninia regra sira hodi garante seguransa enérjia.
“Tanba funu iha médiu oriente agora mós deside taka dalan ba movimentu transasaun mina, maibé Governu deside halo akizisaun kombustível ba gazóleu litru millaun 80, atu bele ajuda rezerva ba fulan hitu (7) ka fulan ualu (8),” nia hateten.
Maske nune’e, nia hateten, Governu kontinua halo esforsu ho importadór sira no asegura tan fontes fornesedór mina ne’e bele mai beibeik iha Timor-Leste.
“Ha’u mós orienta ona Timor Gap atu kontaktu nia kompañia nasionál Estatál ASEAN nian hodi bele esplora posibilidade kouta ruma lori mai atu komplementa iha supplay ne’ebé iha,” nia dehan.
Notísia Relevante:Tane Konsumidór husu Governu foti medida subsídiu ba konsumu kombustível
Jornalista : Alexandra da Costa
Editór : Cancio Ximenes
