OEKUSI, 17 Abríl 2026 (TATOLI) – Autoridade Protesaun Sívil (APC) liuhusi Sentru Formasaun Protesaun Sívil Nasionál, fasilita formasaun teória no prátika kona-ba orden unida ba funsionáriu na’in-25 iha APC Rejiaun Administrativa Espesiál Oekusi Ambeno (RAEOA).
Xefe Departamentu Formasaun APC Nasionál, José Manuél Alves Calado, informa, formasaun ne’e nu’udar atividade rotina husi Sentru Formasaun Protesaun Sívil ho objetivu, atu eleva no kapasita profisionál APC sira-nia koñesimentu, hanesan resiklazen, refreska formasaun tanba nu’udar funsionáriu públiku tenke iha koñesimentu hodi prepara ba selebrasaun loron nasionál sira.
“Nu’udar treinadór, ami espera saida de’it mak ami introdús ona iha formasaun, bele iha mudansa no aumenta ona sira-nia koñesimentu, nune’e iha primeiru semana isár bandeira la dúvida ba instrusaun sira-ne’ebé hetan ona iha durante formasaun semana ida, tanba formasaun kompleta ho teória no prátika,” nia hateten iha edifísiu APC Oekusi, ohin.
Notísia relevante:APC Oekusi ho parseiru avalia serbisu responde dezastre naturál
Iha biban ne’e, João Sila, nu’udar Komandante APC Oekusi, agradese ba Departamentu Sentru Formasaun Nasionál, tanba bele kria polítika hodi fasilita formasaun orden unida ba ekipa APC iha Oekusi.
“Ami-nia esperansa katak, liuhusi formasaun ne’e, ami hothotu bele hatene saida mak orden unida, tanba nu’udar funsionáriu públika obrigatóriu atu hatene kona-ba marsa orden unida, tan ne’e membru APC ne’ebé tuir ona formasaun durante semana ida, prontu ona atu bele responde selebrasaun loron nasionál sira, tanba formasaun ne’e detallu liu no fasíl komprende kona-ba lala’ok marsa orden unida nian,” nia orgullu.
Domingos Meni, nu’udar partisipante, sente orgullu, tanba orden unida ne’e, importante ba funsionáriu públiku sira, nune’e bainhira partisipa iha seremónia nasionál sira, fasíl ba sira atu hatudu iha formatura.
“Iha Oekusi, ami partisipa iha isár bandeira kada fulan realiza iha semana dahuluk, entaun ami hanesan funsionáriu tenke hatene, nune’e ami partisipa karik iha ona koñesimentu,” nia hateten.
Notísia relevante:APC no Similie formaliza kooperasaun kona-ba sistema alerta sedu ba risku dezastre
Entretantu, formasaun ne’e realiza durante semana ida, hahú iha loron segunda-feira 13 Abríl ramata iha loron sesta-feira 17 Abríl 2026 ne’e ho formandu na’in-25, tantu feto no mane.
Jornalista: Abílio Elo Nini
Editór: Rafael Ximenes de A. Belo
