OEKUSI, 17 Abríl 2026 (TATOLI) – Iha trimestre dahuluk, husi Janeiru mai to’o Marsu 2026 ne’e, Autoridade Protesaun Sívil (APC) Rejiaun Administrativa Espesiál Oekusi Ambeno (RAEOA) konsege rejista vítima dezastre naturál hamutuk uma-kain 214 ne’ebé maioria afeta ba inundasaun.
“Dadus 214 ne’e, ita responde ona ho pakote emerjénsia, atuál ita mantein nafatin ho situasaun katak, bainhira enfrenta dezastre ruma, presiza informa ba autoridade lokál sira nune’e bele koordena ho APC atu hetan atendimentu imediata,” Komandante Operasaun APC Oekusi, João Sila, hateten iha Oekusi, ohin.
Notísia relevante:APC Oekusi ho parseiru avalia serbisu responde dezastre naturál
Komandante APC ne’e esplika, tipu dezastre ne’ebé akontese ba família 214 ne’e, mai husi tipu oioin, maibé barakliu mak inundasaun tuirmai inséndiu ahi han uma, anin estraga uma no mota estraga komunidade sira-nia uma.
“Dadus rekuperasaun atu hetan materiál konstrusaun provizória ita rekolla ona uma-kain 10, maibé APC sei kontinua halo asesmentu, bainhira dadus rekolla hotu ona, ita sei submete ba nasionál atu hetan materiál,” nia hateten.
Tanba ne’e, nu’udar Komandante Operasaun APC iha Oekusi, alerta ba nafatin katak, idak-idak tenke kuidadu no prevene-an, husu nafatin ba públiku katak, prevene no proteze an, nune’e labele hetan dezastre, fatin risku sira-ne’ebé iha, tenke rekoñese hanesan mota-ninin, ai-hun boot sira, erosaun no inklui eletrsidade tanba dala-barak mosu inséndiu tan de’it sirkuitu husi ahi.
Notísia relevante:SEPS apoia foos saka 1.500 ba RAEOA hodi atende dezastre naturál
Xefe Costa iha sub-rejiaun Pante Makasar, Francisco Colo, rekomenda atua kontinua tau matan ba vítima sira, nune’e bele hetan tulun emerjénsia husi Governu.
“Ha’u-nia observasaun, durante tempu udan akontese dezastre barak, ezemplu iha suku Bobokase, Cunha no Lalisuk, afeta inundasaun maka’as. Maibé, ita agradese Governu liuhusi serbisu protesaun Sívil, tanba sempre atua imediata apoia emerjénsia. Ida-ne’e povu nia esperansa katak, bainhira hetan susar Govenu mós la taka matan. Ne’ebé, ita espera presiza tau matan nafatin ba ita-nia vítima sira-be’ebé sofre tanba dezastre ne’e ne’e ita la espera,” nia hateten.
Notísia relevante:SEPS tulun vítima dezastre naturál uma-kain 50 iha suku Cunha Pante Makasar
Jornalista: Abílio Elo Nini
Editór: Rafael Ximenes de A. Belo
