DILI, 17 abríl 2026 (TATOLI)—Jestaun Pelican Paradise, afirma katak sei la fó komentáriu kona-ba instrusaun Governu nian ne’ebé ezije kompañia atu husik fatin projetu iha durante loron 10 nia-laran.
Jestór Projetu Pelican Paradise, Osvaldo Boavida, hato’o lia hirak ne’e ba TATOLI lihuhosi online WhatsApp, katak sira-nia parte hili dalan lakohi fó komentáriu kona-ba desizaun ne’e.
“Bom dia!, konfirmasaun Primeiru-Ministru hato’o ne’e. Husi parte kompañia no ha’u sei la halo komentáriu, agora desizaun sira, na’in ulun sira (Governu) mak hatene. Obrigado”, Osvaldo Boavida, hatan ba Tatoli, sesta ne’e.
Antes Ne’e, Primeiru Ministru Kay Rala Xanana Gusmão deklara Katak, Governu foti ona desijaun ne’ebe firme hodi fó Pelican Paradise Loron 10 hodi hamamuk fatin projetu iha área Tibar.
Desizaun ne’e halo liuhosi rezolusaun Governu nian ne’ebé fó knaar ba Vise-Primeiru-Ministru Francisco Kalbuadi Lay hodi halo komunikasaun ho kompañia hodi konkorda kona-ba prazu.
Tuir Xanana Gusmão, pasu ida ne’e ho objetivu atu loke oportunidade ba investidór sira seluk hodi utiliza área ne’e, partikularmente hodi apoia Timor-Leste nia preparasaun hodi sai uma-na’in ba Simeira ASEAN 2029 nian.
Nia subliña mós katak Governu kumpre ona pedidu oioin husi kompañia sira, inklui fornesimentu eletrisidade no bee-moos iha área projetu nian.
Projetu Pelican Paradise nu’udar investimentu boot ida ho valór maizumenus millaun $700 , ne’ebé abranje konstrusaun resort fitun lima, kampu golf, área rezidensiál, no instalasaun komersiál sira iha rejiaun Tasi-Tolu to’o Tibar.
Maibé, dezde nia aprovasaun iha 2018, projetu ne’e seidauk hatudu progresu signifikativu, ne’ebé dudu Governu atu konsidera asaun tuirmai kona-ba nia kontinuasaun.
Jornalista: Arminda Fonseca
Editór: Rafael Ximenes de A. Belo
