DILI, 20 Abríl 2026 (TATOLI) – Pelumenus rezidente na’in 9.007 maka afetadu hosi inséndiu boot ida iha área uma flutuante nian hosi Kampung Bahagia, Sandakan, Sabah, Malázia, iha loron-domingu.
Xefe Polísia Distritu Sandakan, ACP George Abd Rakman, ne’ebé relata hosi BERNAMA, hatete katak nia eskritóriu simu relatóriu ida kona-ba insidente iha tuku 1:30 dadeer, molok área ne’e deklara hanesan área dezastre nian iha tuku 4:00 dadeer.
“Área ida-ne’e maka uma ba uma 1,200-resin, no uma 1,000-resin maka afetadu, hodi rezulta vítima 9,007,” George hatete.
George hatete katak autoridade sira ajuda ativamente koordena kolesaun dadus vítima nian ba objetivu sira evakuasaun no distribuisaun ajuda nian.
Nia nega alegasaun sira ne’ebé sirkula iha mídia sosiál katak ahi ne’e hamate ema ruma.
“Ha’u subliña katak to’o agora, ha’u seidauk simu relatóriu ruma kona-ba vítima sira. Saida maka akontese provavelmente kanek sira bainhira salva propriedade ka ajuda kolega sira seluk,” nia hatete.
George hatete katak operasaun koordenasaun jestaun dezastre nian hala’o hamutuk ho ajénsia oioin, inklui Departamentu Bombeiru no Salvamentu Malázia nian (JBPM) hanesan komandante insidente nian no Forsa Defeza Sivíl Malázia nian (APM).
Nia dehan kauza loloos husi inséndiu ne’e sei iha prosesu investigasaun husi JBPM.
Entretantu, Primeiru Ministru Malázia, Anwar Ibrahim hato’o nia preokupasaun kona-ba akontesimentu inséndiu ne’e.
Anwar husu atu fó prioridade prinsipál mak seguransa hosi vítima sira no distribuisaun imediata hosi ajuda iha terrenu.
“Governu koordena hela ho Governu Estadu Sabah nian hodi fornese asisténsia báziku no akomodasaun temporáriu lalais liután,” nia hatete.
Fonte: Bernama/Antaranews
