DILI, 20 Abríl 2026 (TATOLI)-Parlamentu Nasionál (PN) liuhusi reuniaun plenária aprova alterasaun Lei Órgaun Administrasaun Eleitorál, Lei Eleitorál ba PN, no ba Munisipál iha faze jeneralidade.
Deputadu sira halo diskusaun no aprovasaun ba Projetu Lei númeru 16/VI 83ª, alterasaun dahaat ba Lei númeru 5/2006, loron 28 fulan-Dezembru, Órgaun Administrasaun Eleitorál, alterasaun dalimak ba Lei númeru 6/2006, loron 28 fulan-Dezembru, Lei Eleitorál ba Parlamentu Nasionál no alterasaun dahuluk ba Lei númeru 22/2021, loron 4 fulan-Novembru, Lei Eleitorál Munisipál, ho votu a favór 36, kontra 0 no abstensaun 15.
Prezidente Parlamentu Nasionál, Maria Fernanda Lay, baixa hikas projetu lei ne’e ba Komisaun A ne’ebé Trata Asuntu Konstitusionál no Justisa hodi bele kontinua diskute iha faze espesialidade ba inisiativa ne’e.
Vise-Ministru ba Asuntu Parlamentár, Adérito Hugo da Costa, agradese ba deputadu sira ne’ebé aprezenta inisiativa referida. Ba parte Governu konsidera alterasaun pakote lei tolu ne’e importante tebes hodi bele halo armonizasaun hodi prepara ba eleisaun prezidensiál no podér lokál iha tinan oin no eleisaun parlamentár.
Prezidente Komisaun A, Natalino dos Santos, dehan objetivu husi alterasaun ne’e atu altera artigu tolu iha lei vijente husi pakote lei tolu ne’e, liuliu mandatu no kompozisaun iha órgaun eleitorál hanesan Komisaun Nasionál Eleisaun (CNE, sigla portugés) atu aumenta komisáriu husi na’in-hitu ba sia.
Razaun aumenta númeru komisáriu tanba haree ba sirkunstánsia no eleisaun rua ne’ebé sei akontese iha tinan oin no númeru atuál konsidera insufisiente hodi responde ba serbisu sira.
Iha projetu lei ne’e hakarak esklui reprezentante husi órgaun Konsellu Majistratura Judisiál no Ministériu Públiku. Ho nune’e, kompozisaun sei mai de’it husi Prezidénsia Repúblika, Parlamentu Nasionál no Governu.
Nia esplika katak iha alterasaun ne’e mós hodi halo ajustamentu Lei Eleitorál ba Parlamentu no Lei Eleisaun Munisipál prevee artigu ida ko’alia kona-ba koligasaun partidu polítiku iha pré-eleitorál no pós-eleisaun tenke fiksa iha ne’ebá.
Lembra katak Lei Eleitorál mak regula eleisaun deputadu ba Parlamentu Nasionál no Lei Eleitorál Munisipál regula eleisaun Prezidente Munisípiu, Vise-Prezidente Munisípiu no deputadu asembleia munisipál. Lei Órgaun Administrasaun Eleitorál ko’alia kona-ba órgaun eleitorál ne’ebé ezerse funsaun relativamente ba aktu eleitorál hothotu.
Jornalista: Nelson de Sousa
Editora: Maria Auxiliadora
