DILI, 20 Abríl 2026 (TATOLI) – Portavós Polísia Nasionál Timor-Leste (PNTL) Superintendente Xefe Polísia João Belo dos Reis, klarifika Xineza na’in-rua ne’ebé Domingu (19/4) foin lalais ne’e halo halo viajen ho aviaun Citilink ba fali sira-nia nasaun orijen Xina ne’e la’ós suspeitu ba kazu osan falsu tanba molok troka osan $100 ba troka iha loja supermerkadu Centro.
“Suspeitu prinsipál na’in-tolu ne’ebé envolve iha kazu osan falsu ho montante millaun $4-resin ne’e Tribunál aplika ona prizaun preventiva ona no iha mós autór balun ne’ebé sei iha identifikasaun nia laran, tanba ne’e suspeitu sira ne’ebé Polísia buka ne’e la inklui Xinés na’in-rua ne’ebé fó sai iha mídia katak halai tiha ona husi Timor-Leste,” Superintendente Xefe Polísia João Belo dos Reis ba jornalista sira iha nia kna’ar fatin Komandu Jerál PNTL Kaikoli segunda ne’e.
Nia dehan, agora dadaun polísia identifika ona suspeitu balun kona-ba kazu osan falsu ne’e. “Ami hein mandadu husi Ministeriu Públiku para halo Investigasaun. Maibé, kona-ba segredu justisa ha’u lako’alia buat barak se lae ema sé lae ema sira ne’e halai hotu,” nia dehan.
João Belo hateten, iha ema lubuk ida mak polísia sei investiga, sira ne’ebé maka hatene, sira ne’ebé mak hatene kona-ba osan falsu no pasa kona-ba informasaun ne’e sei bolu hotu.
Autoridade seguransa dehan, autór-na’in rua ne’ebé deskonfia sirkula osan falsu ne’ebé sidadaun Xineza na’in-rua ne’ebé Domingu (19/04), halai ona ne’e la tama iha lista suspeitu ne’ebé polísia buka.
“Sira-nia oin mak kuaze hanensan, maibé prosesu ne’ebé la’o sei indentifika se se maka envolve iha kazu osan falsu ne’e prosesu ba sira sei kontinua,” nia informa.
Nia dehan, PNTL kontinua aprezenta suspeitu sira hotu ne’ebé envolve iha kazu osan falsu ba Ministériu Públiku atu hasai medadu detensaun no apreensaun ba sira.
“Suspeitu sira-nia ne’ebé naran iha lista, ami sei ko’alia, ami sei koordena no komunika bá iha autoridade Migrasaun, para pelumenus ho situasaun sira hanensan ne’e mai sira bele impede hodi entrega servisu ne’e bá ami,” nia akresenta.
Notísia relevante:Xinés na’in-rua ne’ebé troka osan falsu iha loja Centro sai ona husi Timor-Leste
João Belo hateten, ba kazu osan falsu ne’e polísia mós sei halo koodenasaun ho Embaixada Xina no komunidade Xineza ne’ebé loke negósiu iha Timor hodi bele hodi hato’o informasaun prevensaun, atu nune’e, sidadaun estranjeiru sira hatene lei hothotu iha Timor-Leste, hodi prevene aan husi aktu krime orgnanizadu sira.
Tanba koordena sira hanesan Komandante Jerál PNTL sesante Komisáriu Jerál Henrique da Costa mós molok halo enkontru koodenasaun ho Xineza hodi partilla kona-ba situasaun seguransa ein jerál no lei iha Timor-Leste nune’e Xineza sira bele hatene.
“Husu ba sidadaun hotu atu koopera ho polísia karik hetan osan falsu bele informa ba Polísia nune’e polísia bele halo kedan atusaun”, nia fó-hanoin.
Jornalista: Natalino Costa
Editór: Rafael Ximenes de A. Belo
