KOVALIMA , 20 Abríl 2026 (TATOLI)- Polísia Nasionál Timor-Leste (PNTL), Munisípiu Kovalima, liuhusi Sesaun Investigasaun no Polísiamentu Komunitária partilla informasaun ba negosiánte kona-bá osan falsu hanesan $100 falsu no sentavu 200 ba negosiánte sira iha merkadu suku Debos postu Administrativu Suai, Munisípiu Kovalima.
PNTL Munisípiu Kovalima, partilla informasaun relasiona sidadaun balun espalla osan sentavu 200 falsu lori halo tranzasaun iha merkadu Loja no seluk tan.
“Bazeia ba orientasaun husi Komandu Jerál PNTL atu partilla informasaun relasiona osan sentavu 200 falsu sirkula iha ita-nia rai tanba ne’e Komandu PNTL Kovalima partilla informasaun ba negosiánte iha Merkadu no loja iha munisípiu Kovalima”, Segundu Komandante PNTL Munisípiu Kovalima, Superintendente Asistente Polísia Delfin da Silva hato’o iha ba komandu PNTL Munisípiu Kovalima- Santa Rosa.
Mekanizmu sosializasaun PNTL liuhusi sesaun Polísiamentu Komunitária hodi demostra osan sentavu 200 falsu no orijinál bainhira osan ne’ebé falsu dulas iha telefone leten osan referidu sei halai no osan orijinál bainhira dulas sei la halai.
Iha atividade sosializasaun ne’e Komandu PNTL mós husu ba negosiánte iha merkadu no loja xineza bainhira sidadaun sira halo tranzasaun uza osan sentavu 200 falsu hodu hatoo keixa ba Komandu PNTL Munisípiu Kovalima hodi halo atusaun nune’e komunidade labele sai vítima.
Kona-bá komunidade sira iha postu administivu sira ita halo ona enkontru ho ofisiál polísia suku na’in-30 hodi kontinua partilla informasaun ba komunidade kona-bá osan sentavu 200.
PNTL Munisípiu Kovalima partilla informasaun kona-bá osan sentavu 200 ba komunidade sira kuaze semana ida ona nune’e komunidade sira iha ona koñesmentu hodi define osan sentavu 200 falsu no orijinál.
PNTL mós sei koordena ho Banku bainhira identifika osan falsu sei la fó fila no sei la devolve mós osan orijinál ba sira.
Iha sorin seluk, Negosiánte Deonisia Carvalho, dehan negosiánte sira ne’ebé mak faan modo iha merkadu presiza duni informasaun atu define osan sentavu 200 tanba bazeia ba informasaun ne’ebé akompaña husi média katak osan sentavu 200 falsu sirkula ona Timor-Leste.
“Ami presiza duni iha koñesementu oinsá atu identifika osan ne’ebé falsu no orijinál, nune’e sidadaun se mak sosa ami nia modo uza osan falsu ami sei hato’o keix ba PNTL nune’e halo investigasaun”, nia dehan.
Jornalista:Celestina Teles
Editór: Florencio Miranda Ximenes
