DILI, 20 Abríl 2026 (TATOLI)- Polísia Nasionál Timor-Leste (PNTL) liuhusi Diresaun Servisu Investigasaun Kriminal (DSIK) iha Polísia Nasionál Timor-Leste (PNTL), ezekuta mandadu Tribunál Judisiál Primeira Instánsia Dili (TJPID) detein kondenadu kazál na’in-rua inan nurak ho naran inisiál HX ho MB lori ba kumpri sentensa iha prizaun Bekora no Gleno.
Koodenadu na’in rua ne’e komete krime ofensa integridade fízika grave ne’ebé previstu no punidu iha artigu146 husi Kódigu Penál Timor-Leste no violénsia doméstika tuir númeru 7/2010.
Kondenadu na’in rua ne’e halo asaun hasoru lezada MdS iha loron 17 fulan-Marsu 2023 iha aldeia, Laloran, Suku Bairo Pite, Postu administrativu Dom Aleixo Munisípiu Dili. Husi kondenadu na’in rua nia hahalok ne’e rezulta Mds to’o interna (baixa) iha Hospital Nasional Guidu Valadares (HNGV) no lakonsege salva nia vida.
Ho kazu ne’e mak iha loron ( 20/04) tuku 09:30, Autoridade Seguransa Diresaun Servisu Investigasaun Kriminál (DSIK) simu orden hodi ezekuta mandadu Tribunál Judisiál Primeira Instánsia Dili (TJPID) ho númeru rejistu NUK : 0161/23.DICMR hodi lokaliza kedan kazál nain rua nia hela fatin halo identifikasaun no halo sertifikasaun ba sira molok lori kondenadu na’in rua ne’e ba kumpre iha Prizaun Bekora no Gleno.
“Nune’e iha ezekusaun mandadu dahuluk detein suspeitu ho inisiál; HX idade 45 iha Aldeia Laloran, Suku Bairru-Pité, postu administrativu Dom Aleixo Munisípiu Dili lori ba prizaun sei kumpri nia sal durante tinan hitu”, hateten husi Komunikadu ne’ebé TATOLI asesu segunda ohin.
Enkuantu koodenadu inisiál MB idade (41) inan nurak iha Fatukeru, postu administrativu Gleno Munisípiu Ermera lori ba prizaun no sei kumpre nia pena durante tinan-lima.
Iha prosesu ezekuta mandadu Tribunál Judisiál Primeira Instánsia Dili (TJPID) la’o ho di’ak, tanba suspeitu kazál na’in rua, inan-nurak ho nia bebé foin halo fulan rua koopera di’ak ho ekipa nune’e Diresaun Servisu Investigasaun Kriminál (DSIK) hodi lori ba kumpri iha prizaun.
Notísia relevante:MP solisita tribunál aplika pena prizaun tinan-haat fulan-neen ba arguidu CMX
Jornalista: Natalino Costa
Editór: Rafael Ximenes de A. Belo
