OEKUSI, 22 Abríl 2026 (TATOLI) – Sentru Nasionál Chega, Institutu Públiku (CNC, I.P), kuarta ne’e, hala’o enkontru koordenasaun ho Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, ba futuru atu estabelese muzeu memoriál ida iha Oekusi.
“Ohin ami enkontru kontinuasaun dalarua ona, mai atu koordena hodi estabelese muzeu memoriál ida iha Oekusi,” Xefe Departementu Prezervasaun Memoriál CNC, I.P, Arjentinho de Jesus Ximenes, ba jornalista sira iha Oekusi, ohin.
Nia informa, iha enkontru koordenasaun ne’e, parte Chega,I.P propoin ba Autoridade RAEOA hodi apoia fatin atu estabelese, tanba Chega nia Planu Asaun Anuál (PAA) 2026 ne’e atu estabelese múzeu memoriál rua; ida iha munisípiu Likisá, ida iha RAEOA rasik.
Ho nune’e nia orgullu tanba hafoin koordena ho parte Terra no Propriedade, no Prezidente Autoridade RAEOA, iha rezultadu pozitivu hodi entrega edifísiu ida, nune’e ba futuru bele halo reabilitasaun, tanba tuir planu, múzeu memoriál rua ne’e sei hatuur fatuk dahuluk iha fulan-Novembru 2026 ne’e.
Tuir nia, kada tinan Governu atribui kompeténsia ba Sentru Chega,I.P, atu estabelese muzeu memoriál iha kada munisípiu ho objetivu husi estabelesimentu múzeu memoriál ne’e atu konserva no konserva memória instituisaun ka memória pasada munisipíu idaidak, tanba Oekusi iha nia istória no pasadu rasik nune’e bele kontribui ba prosesu dezenvolvimentu iha Oekusi rasik.
“Entaun tinan kotuk ami estabelese múzeu neen iha munisípiu neen, no tinan ne’e sei estabelese rua iha munisípiu Likisá no Oekusi, planu tinan oin sei kompleta ba munisípiu haat,” nia afirma.
Notísia relevante:CNC, I.P harii ona muzeu memoriál iha munisípiu haat
Diretór Diresaun Rejionál Terra no Propriedade Oekusi, José Ase Neno Colo, konsidera polítika estabelesimentu múzeu memoriál iha Oekusi importante, nune’e Autoridade RAEOA sei identifika uma estadu ne’ebé abandonadu inklui rai Estadu atu atribui ba Chega,I.P.
“Polítika ne’e nu’udar autoridade RAEOA ita apoia, tanba sentru muzeu memoriál iha Oekusi seidauk iha. Ne’ebé, iha koordenasaun ne’e, ohin Prezidente Autoridade orienta terra propriedade atu identifika edifísiu ne’ebé mamuk, bele atribui ba Chega atu hala’o sira-nia serbisu, ne’ebé ohin seidauk iha desizaun finál sei iha opsaun, ita sei identifika uma no rai, maibé RAEOA nafatin apoia polítika Chega nian atu estabelese múzeu ida iha Oekusi,” nia hateten.
Notísia relevante:CNC,I.P oferese $14.000-resin ba Muzeu Memoriál Munisipál Manufahi
Jornalista: Abílio Elo Nini
Editór: Rafael Ximenes de A. Belo
