OEKUSI, 22 Abríl 2026 (TATOLI) – Projetu reabilitasaun estrada ho kategória emerjénsia kilometru ida (1) metru 850 iha aldeia Sabén suku Bobometo sub-rejiaun Oésilo, nia progresu fíziku atinje ona 12,45% no clearing-grubbing konklui ona 100%, Diretór Diresaun Rejionál Infraestrutura (DRI) iha Rejiaun Administrativa Espesiál Oekusi Ambeno (RAEOA), Remigío Nuno Sila, informa.
“Ezekuta husi empregadór lokál ida, ho nia item serbisu mai husi clearing-grubbing escavation no mós aterru, no planu ba futuru sei kompleta ho morru protesaun, kanalizasaun bee-dalan inklui ponte ki’ik, atu evita bee-nalihun no inundasaun,” nia hateten ba jornalista sira iha Oekusi, ohin.
Diretór ne’e esplika, husi pursentu 12,45% ne’e, nia item serbisu clearing-grubbing (hamoos dalan nia baze hotu ona. Rai prontu ona atu hahú tau britas no aspal) konklui ona 100%, ho nia distánsia kilometu ida, metru 850. Husi 100% ne’e empreza halo ona aterru, haluan estrada no halo eskavasaun hasai tahu dodok hodi aterru fali ho rai seletadu, bele rai-henek no rai ne’ebé merese atu uza ba ateru estrada.
Notísia relevante:Autoridade observa kondisaun estrada Sabén iha Oésilo, sei reabilita ho tipu emerjénsia
Autoridade Obra Públika Oekusi ne’e, informa, daudaun ne’e empreza kumpre de’it orden serbisu hodi hein kontratu definitivu maibé Autoridade RAEOA tau prioridade ho razaun atu responde preokupasaun komunidade sira no transporte públiku hodi ultrapasa iha tempu udan.
“Nia kontratu seidauk iha maibé orden serbisu hetan ona, tanba nesesidade púb
liku atu fasilita movimentu komunidade no transporte públiku hodi asesu, entaun kompañia kumpri orden ne’e atu hala’o serbisu, ita espera iha tempu-badak bainhira instala ona Sekretáriadu FED, bele hetan ona kontratu definitivu,” nia hateten.
Notísia relevante:Empreza Pen Seka hahú reabilita estrada Sabén iha Oésilo ba kilometru 1.850
Iha biban ne’e, Xefe aldeia Sabén Abílio Ili, sente haksolok, no rekomenda ba futuru la’ós aterru de’it maibé presiza nahe ho simente, kompleta ho bee-dalan no instala mós liña elétrika, tanba estrada Sabén lokaliza kedas iha fronteira ho nasaun viziña ho nia distánsia la to’o metru-100.
“Ha’u agradese ba Governu tanba ami tinan barak ona, ha’u espera estrada ne’e finaliza karik, kontinua tan nahe ho simente, tau mós bee-dalan no monta liña elétrika (lampu-jalan), tanba ami iha ne’e nu’udar imajen ba nasaun viziñu,” nia espera.
Notísia relevante:Autoridade RAEOA ho Lian-na’in realiza seremónia kulturál hodi reabilita estrada rurál iha Sabén
Entretantu, totál populasaun iha aldeia Sabén hamutuk uma-kain 300 no projetu reabilitasaun estrada ne’e, ezekuta husi empreza Pen Seka Unipesoál Lda, ho durasaun serbisu fulan-neen, no daudaun ne’e simu ona orden serbisu no ezekuta ona konstrusaun hodi hein kontratu definitivu ho Autoridade RAEOA.
Jornalista: Abílio Elo Nini
Editór: Rafael Ximenes de A. Belo
