DILI, 21 Abríl 2026 (TATOLI) – Sekretáriu Estadu Komunikasaun Sosiál (SEKOMS), Expedito Dias Ximenes, tersa ohin ne’e, prevee verba ho montante 240.000 hodi apoia atividade rádiu komunidade hodi bele funsiona di’ak liután.
Seremónia ne’e hala’o liuhusi kontratu servisu ne’e bé SEKOMS halo ho rádiu komunidade 14.
Husi orsamentu $ 240.000 ne’ebé SEKOMS apoia ne’e kada Rádiu Komunidade sira hetan entre $7.000 to’o $8.000 hodi sosa antena, misturadór (mixer), mikrofone, gravadór hodi bele halo gravasaun, nune’e mós jestaun administrativa ne’ebé sira bele halo iha sira-nia rádiu komunidade.
“Sekretária Estadu Komunikasaun Sosiál reprezenta Governu, asina kontratu ho servisu mútuu ho rádiu komunidade ne’ebé iha Timor nia laran tomak, ne’ebé ita-nia rádiu komunidade hothotu”, Expedito Dias hateten ba jornalista sira hafoin asina kontratu servisu ho rádiu komunidade sira Palásiu tersa ne’e.
Governante ne’e dehan, razaun Governu apoia rádiu komunidade sira ne’e tanba rádiu komunidade ne’e frontline ka liña oin ba informasaun iha komunidade.
“Tanba ne’e mak bainhira ami halo vizita hodi bele haree jestaun rádiu komunidade nian, ami sempre husu katak rádiu komunidade ne’e forma husi komunidade, maka nia kobertura no nia atividade ne’ebé halo iha munisípiu sira-ne’e tenke fó atensaun maka’as liubá atividade agrikultór nian”, nia dehan.
SEKOMS Expedito husu ba Rádiu Komunidade sira atu halo atividade kobertura ba asuntu sosiál 60 pursentu no Governu nia iha 40 pursentu.
“Halo kobertura ba atividade joven rezisténsia sira-ne’ebé iha potensiál, no mós atividade ba agrikultór sira-ne’ebé halo servisu hodi halo produsaun iha natar, iha to’os”, nia fó-hanoin.
Governante ne’e hatutan, tenke fó kobertura ba joven sira-ne’ebé iha talentu di’ak, karik iha múzika, bele konvida sira mai fahe esperiénsia iha talk show ne’ebé halo iha rádiu komunidade ka estúdiu rádiu komunidade.
Nia dehan, apoiu ne’ebé Governu fó ba Rádiu Komunidade ne’ebé tinan ida-ne’e, bazeia ba sira-nia proposta.
SEKOMS husu ba Rádiu Komunidade sira atu uza osan ne’e tuir regra la’ós uza osan la tuir regra orsamentu.
“Osan ne’ebé ita fó ba sira ne’e bazeia ba sira-nia proposta no mós sira ne’ebé halo relátoriu ne’ebé di’ak tuir regra, tanba ne’e mak sira mós hetan tuir sira-nia proposta”, nia dehan.
Iha fatin hanesan, Administradór Postu Administrativu Balibó Casimero, hateten, nu’udar jestór ba rádiu komunidade fronteira Balibó Five kontente no agradese ba Governu dasia liuhusi SEKOMS tanba bele apoia rádiu fronteira Balibó lima hodi kontinua halo nia atividade.
Durante ne’e rádiu komunidade Fronteira Balibó Five halo halo transmisaun ba atividade Governu lokál nian no ba atividade sosiál sira.
Nune’e mós jestora rádiu ema ho difisiensia Timor-Leste Emerenciana Alves mós agradese ba SEKOMS tanba bele apoiu rádiu ema ho difisiénsia.
Nia dehan, orsamentu ne’ebé mak SEKOMS apoia ne’e sei finansia ba atividade haat talk show, notísia, PSA (Public Service Announcement – Anúnsiu servisu públiku) no drama.
Jornalista Natalino Costa
Editór: Rafael Ximenes de A. Belo
