DILI, 25 Abríl 2026 (TATOLI) – Atividade peska ilegál ne’ebé kontinua iha tasi Timór halo país lakon millaun dolar kada tinan. Tuir Primeiru-Ministru, Xanana Gusmão, Governu kontinua halo esforsu liuhusi negosiasaun ho Indonézia atu rezolve problema fronteira marítima entre nasaun rua.
“Ha’u informa ba Prezidente Repúblika katak sábadu ha’u sai bá Singapura atu partisipa terseira ronda negosiasaun kona-ba fronteira marítima. Ita husu boot ronda ida-ne’e bele fó hanoin ruma ba ita, tanba ita lakon hela dezeña milaun dolar iha tasi Timór”, Xanana Gusmão hateten iha Palásiu Prezidensiál Bairru Pité, Dili, ohin.
Nia dehan katak mídia sira relata kona-ba ró estranjeiru sira ne’ebé kontinua halo atividade peska ilegál ne’e, tanba Timor-Leste ita seidauk iha kapasidade atu kontrola didi’ak nia tasi.
Xanana subliña katak kestaun ida-ne’e horisehik diskute iha reuniaun Konselu Ministru no orienta ona ba Polísia Nasionál Timor-Leste, liuhusi Unidade Polísia Marítima (UPM) atu prepara rekursu umanu, inklui formasaun pilotu atu kaer ró boot.
“Bainhira sira prepara an ona, ita bele sosa ró boot ida halo patrullamentu no kontrola ita-nia rikusoin tasi, liuliu ikan. Ha’u dehan prepara an tiha mak ita sosa ró, enkuantu ha’u ho Indonézia rezolve tiha fronteira tomak, nune’e ita bele kontrola tasi, duni ema ilegál”, nia hateten.
Sekretáriu Estadu Peska, Domingos dos Santos, salienta katak difísil atu kombate peska illegal, tanba seidauk iha desizaun fronteira marítima entre Timor-Leste no Indonézia.
“Bainhira [ró] sira mai kaer ikan no ita hetan, sira halo finje filafali bá sira-nia área dehan sira foti [foti ikan iha] sira-nia área de’it”, nia hateten.
Ministériu Agrikultura, Pekuária, Peska no Floresta (MAPPF), lihuhusi Diresaun-Jerál Inspesaun no Monitorizasaun Sistema, rejista katak husi tinan 2024 to’o Abríl 2026 iha ró peska ilegál hamutuk 38 mak halo atividade iha tasi Timór. Husi atividade ilegál ne’e estima katak Timor-Leste lakon ikan hamutuk tonelada 2.280, ne’ebé konverte ba osan $48.586.000.
Notísia relevante: 2024-2026, Timor-Leste lakon millaun $48-resin tanba atividade peska ilegál
Lembra katak, iha loron 02 Abríl 2026, Primeiru-Ministru, Xanana Gusmão, hateten ona katak ronda datoluk diskusaun negosiasaun Fronteitra Marítima (FM) entre Timor-Leste no Indonézia sei hala’o iha Singapura, husi loron 25 to’o 30 Abríl 2026.
Nia dehan diskusaun FM entre nasaun rua sei lori tempu naruk, nune’e nia husu ba públiku atu hein ho kalma to’o loron ida sei finaliza ho susesu.
Jornalista: Arminda Fonseca
Editora: Maria Auxiliadora
