OEKUSI, 23 Abríl 2026 (TATOLI) – Komandante Polísia Nasionál Timor-Leste (PNTL) Rejiaun Administrativa Espesiál Oekusi Ambeno (RAEOA), Superintendente Xefe Polísia, Nicolau Francelino da Costa, lidera hikas komandu PNTL Oekusi no tau prioridade ba asuntu haat no promete sei akumula entidade hotu.
Notísia relevante:Komandante Jerál Afonso dos Santos fó pose ba ofisiál superiór PNTL na’in -13
Autoridade Polísial ne’e informa, iha ámbitu seremónia dezdepedida ho Komandante Sesante, Superentende Asistente Polísia, Angelo Quelo, iha kuartel jerál Komandu PNTL Oekusi, kinta ohin.
Nia hateten, durante mandatu atividade prinsipál haat mak sai prioridade, primeiru reforsa di’ak liután serbisu intelejénsia polísia, investigasaun kriminál, patrullamentu polísia no tránzitu seguransa rodoviária.
“Ida-ne’e mak planu prioridade ne’ebé mak orienta husi Komandu Jerál ba iha munisípiu hothotu inklui RAEOA tanba ha’u-nia prezensa iha ne’e, oinsá atu koopera serbisu hamutuk ho entidade hotu, liliu veteranu, Autoridade RAEOA, autoridade lokál, juventude rezisténsia inklui komunidade sira,” nia hateten iha Komandu PNTL Oekusi, ohin.
Nia informa, prioridade seluk durante lidera komandu PNTL RAEOA, sei kumpre de’it korridór Komandu Jerál PNTL nian, bazeia planu estratéjiku, atu kontinua no ezekuta, tanba orientasaun klara, liliu halo kontaktu permanente nafatin no diálogu permanente ho ita-nia komunidade sira, no halo ligasaun permanente ho veteranu no entidade sira seluk ne’ebé eziste iha Oekusi.
Notísia relevante:Komandu PNTL nomea Inspetór Xefe Angelo Quelo ba Komandante Interinu Oekusi
Superintende Asistente Polísia, Angelo Quelo, afirma, nu’udar membru seguransa sei apoia serbisu komandu atu garante situasaun hakmatek iha povu nia leet.
“Ha’u hanesan Atoni-oan, saida mak ha’u halo ona, la barak uitoan maibé halo. Situasaun iha Oekusi tenke kontroladu. Hanesan polísia, 100% ha’u apoia atu serbisu seguransa la’o nafatin tanba komunidade sira tenke moris hakmatek,” nia hateten.
Notísia relevante:PNTL Oekusi rejista kazu 300-resin, na’in-13 tama prizaun
Rekorde fali katak, Superintende Asistente Polísia, Angelo Quelo, lidera komandu PNTL Oekusi durante tinan ida, hahú iha loron 14 fulan-Marsu 2025 to’o loron 20 Abríl 2026 ne’e.
Jornalista: Abílio Elo Nini
Editór: Rafael Ximenes de A. Belo
