DILI, 24 Abríl 2026 (TATOLI)-Sekretária Estadu Igualdade Jéneru, Elvina de Sousa, enkoraja feto pontensiál sira atu kompete iha eleisaun podér lokál ne’ebé sei realiza iha tinan oin.
Nia husu atu feto sira kontinua prepara an, liuliu partidu polítiku sira atu empodera no hakbiit liuhusi sira-nia organizasaun feto iha partidu no organizasaun sira seluk hodi kompete eleisaun Prezidente Munisipál no Asembleia Munisipál nian. Tanba lei garante 30% feto atu partisipa iha asembleia munisipál.
“Partisipasaun feto importante tebes hodi haforsa demokrasia no sai reprezentante povu nu’udar deputadu lokál iha idaidak nia munisípiu, hodi sai nu’udar matan no tilun povu nian”, nia hato’o.
SEI nia papél mak atu empodera feto sira no dudu sira partisipa iha polítika, ne’ebé parseria ho sosiedade sivíl, partidu polítiku no organizasaun feto sira hodi halo atividade formasaun iha munisípiu sira ho lema “Feto Prontu Lidera”.
Aleinde ne’e implementa Planu Estratéjiku ba Partisipasaun Feto iha Polítika, sosializasaun hodi enkoraja feto atu kandidata an sai deputadu asembleia munisipál no Prezidente no Vise Munisípiu.
Notísia relevante: CNE enkoraja feto partisipa iha eleisaun podér lokál
Jornalista: Nelson de Sousa
Editora: Maria Auxiliadora
