DILI, 24 Abríl 2026 (TATOLI) –Vogál II Institutu Kualidade Timor-Leste (IQTL, sigla portugés), Gustavo de Oliveira Maia, informa katak hafoin inauguraun laboratóriu kalibrasaun nian iha Marsu tinan ne’e, instituisaun hahú ona atividade kalibrasaun iha munisípiu sira, inklui Dili, maski seidauk bele kobre taxa ba serbisu ne’ebé halo.
Tuir nia, atividade sira ne’e kobre kalibrasaun ba ekipamentu medisaun nian, hanesan sistema gás petróleu likifeitu (LPG) iha postu kombustivel sira iha Dili, nomós balansa utilizada husi empreza empreza sira iha merkadu nasionál. IQTL realiza ona intervensaun sira iha munisípiu Lautein, Vikeke, Baukau, Manatutu, Ermera, Likisá, Kovalima no Bobonaru.
“Ita prepara hela kalendáriu atu halo tan atividade kalibrasaun iha laboratóriu hothotu ne’ebé kompañia sira harii iha Timor-Leste. Sei bá halo kalibrasaun ba sira-nia ekipamentu, halo komparasaun ho ita-nia laboratóriu ne’ebé kumpre padraun internasionál, hodi bele halo balansu”, Gustavo de Oliveira Maia hateten ba Tatoli iha nia knaar fatin, ohin.
Dirijente destaka katak maski servisu ida-ne’e importante tebes, IQTL seidauk bele kobra taxa, tanba Governu seidauk aprova tabela ba taxa nian.
“Ami halo atendimentu de’it ba emprezáriu sira atu asegura konsumidór sira-nia direitu. Maibé ha’u husu ba Governu aprova lalais tabela taxa kalibrasaun nian, nune’e ita bele dada taxa hodi kontribui reseita ba konfre Estadu”, nia sujere.
Hodi akresenta katak durante halo kalibrasaun la deteta irregularidade ou manipulasaun ba iha kuantidade husi parte operadór ekonómiku durante asaun kalibrasaun.
Tuir nia, taxa kalibrasaun definide bazeia ba kapasidade ekipamentu, varia entre $0,10 to’o rihun $500.
Lembra katak laboratóriu kalibrasaun IQTL inaugura husi Governu iha loron 17 Novembru 2025.
Laboratóriu kalibrasaun IQTL kobre área prinsipál neen: masa, temperature, dimensaun, presaun, umidade no forsa/torke/karga.
Notísia relevante: IQTL halo levantamentu dadus ba setór privadu sira iha munisípiu lima
Jornalista: Arminda Fonseca
Editora: Maria Auxiliadora
