DILI, 24 Abril 2026 (TATOLI)—Diretora Diresaun Nasionál Ambulánsia Servisu Opsitalár (DNASH) iha Ministeriu Saúde, Maria Santina de Jesus Gomes, informa iha trimestre dahuluk (Janeiru to’o Marsu) ne’e, Ministériu Saúde transfere pasiente hamutuk 40 hodi hala’o tratamenntu saúde iha rai-li’ur.
“Durante fulan tolu, ita transfere ona pasiente sira-ne’e maibé sira-na’in 10 mak sei hein konfirmasaun husi opsitál rai-li’ur hanesan ospitál Priscut Sunway no ospitál PKJ Medikal Center iha Malázia. Agora, Singapura, ida-ne’e ami haruka pasiente labarik de’it mak ba ne’ebá, tanba iha Malazia ne’e kapasidade médiku ne’eba la sufisiente tratamentu ba labarik ho idade tinan ida to’o 13, tanba ne’e ami haruka ba singapura,” Santina de Jesus hateten ba jornalista sira iha nia kna’ar fatin, Kaikoli, ohin.
Nia relata, kazu sira-ne’ebé mak Ministériu Saúde transfere maioria ne’e parte sira kazu kankru no kurasaun.
“Moras balun ne’ebé mak presiza operasaun no balun ba halo kemoterapia, balun ba kontinuasaun kemo no balun ba foin mak atu hahú, depende ba sira halo rekomendasaun,” nia esplika.
Nia dehan, kazu pasiente mate iha estranjeiru iha tinan kotuk na’in-haat (4) maibé mate iha Timor no halo tratamentu ne’e laiha, bainhira sira halo tratamentu iha rai-li’ur mak mate iha ne’e, maibé pasiente balun sei iha ne’ebá no balun sei halo tratamentu.
“Ba kazu kankru hamutuk 75 pesoa ne’ebé haruka mai iha ne’e. Agora aprovadu tiha ona hamutuk 50 pesoa maibé balun sei hein aprovasaun husi ospitál rai-li’ur. Tanba, sira-nia ospitál la’ós simu de’it husi Timor de’it. Husi ospitál boot iha Indonézia simu, maibé fatin ne’ebé laiha tratamentu ne’ebé apropriadu simu husi fatin hotu-hotu la’ós Timor de’it. Ita tenke hein fatin iha mak ita haruka pasiente ba ne’ebá ne’e no iha médiku ne’ebé apropriadu. Kona-ba moras ne’ebé ita haruka ba karik sira bele simu, bele simu. Karik labele simu, ami sei buka solusaun ba ospitál seluk,” nia dehan.
Nia haktuir, sira-nia ai-moruk ne’ebé mak aprova justa médiku haruka mai Diresaun Nasionál Ambulánsia Servisu Opsitalár (DNASH), depois hato’o ba Diresaun Nasionál Ambulánsia Servisu Opsitalár (DNASH) halo pedidu ba iha Institutu Nasionál Farmásia no Medikamentu (INFPM) depois INFPM haruka mai, felizmente agora ne’e kuaze ai-moruk ne’ebé husu ne’e hotu ona.
“Agora mak ai-moruk to’o iha ne’e, ami-nia ofisiál sira ba foti iha INFPM. Depois ai-moruk sira-ne’e lori ba ospitál para moras ne’ebé husu ai-moruk ne’e ba simu iha ospitál,” nia dehan.
Jornalista : Felicidade Ximenes
Editór : Cancio Ximenes
