DILI, 27 Abríl 2026 (TATOLI)—Kombantente balun nafatin kestiona prosesu atribuisaun fixa pagamentu tanba inkonsisténsia iha kolokasaun data simu fixa.
Veterana hosi Munisípiu Aileu, Marta Castro da Silva “Laobuti”, hateten sira haree lista ne’ebé taka sai iha munisípiu ne’e katak Aileu monu iha 27 Abríl no Ainaru iha 28 Abríl, maibé pratikamente kontráriu fali.
“Ida-ne’e ha’u dúvida. Tanbasá mak lista ne’ebé taka iha ami-nia munisípiu ne’e dehan ami Aileu simu iha 27 Abríl, maibé ekipa verifikasaun no atribuisaun bolu mak Ainaru fali. Ida-ne’e saida mak ne’e. Presiza Ministru Oan-Soru nia esplikasaun,” nia dehan ba jornalista sira iha Edifísiu MAKLN, Komoro, Segunda ne’e.
Laobuti akresenta loloos ne’e prosesu atribuisaun fixa pagamentu presiza iha regra no étika iha formatura. La’ós benefisiáriu Aileu túr ona dezde dadeer, sira hosi Ainaru saruntu mai de’it. Ida-ne’e sai preokupasaun no presiza hadi’a.
“Tanba iha ami-nia munisípiu ne’e hanorin, túr tuir malu, la’ós haksoit fali iha formatura laran. Mai ikus tenke ikus, la’ós ikus mai haksoit bá-oin. Ida-ne’e ema boot sira presiza akompaña no tenke tuir regra,” nia sujere.
Notísia relevante: Ohin, MAKLN hahú pagamentu pensaun veteranu faze daruak ba benefisiáriu 3.391
Iha fatin hanesan, Veteranu Francisco Araújo “Logo” informa, tuir oráriu ne’ebé mak taka iha kada Munisípiu katak ohin Ministériu Asuntu Kombatente Libertasaun Nasionál sei atribui fixa pagamentu ba daruak, entaun horisehik maihusi munisípiu no ohin dadeer mak mai iha fatin atu bele asesu fixa pagamentu.
“Ha’u-nia naran taka sai ona iha munisípiu no ohin loron ami iha-ne’e atu simu fixa pagamentu no tuir munisípiu idaidak, tanba ne’e mak ami mai horisehik no hodi-kalan toba iha família sira no ohin dadeer mak mai iha-ne’e, ne’ebé ami kontinua forma iha-ne’e atubele hetan fixa pagamentu,” Veteranu Francisco Araújo haktuir.
Nune’e mós, Veterana Cristina da Silva husi Munisípiu Ainaru afirma sira mai hatama tiha ona iha faze primeiru tanba dokumentu la kompletu tanba Ministériu Asuntu Kombatente Libertasaun Nasionál haruka atu bá kompleta dokumentu, no foin daudaun taka sai fali entaun ohin sira mai atubele simu fixa pagamentu.
“Ohin mai iha-ne’e tanba uluk ami atu simu ema dehan ami-nia dokumentu la kompletu. Ne’e mak ami la konsege simu no haruka ami halo kompleta tiha dokumentu. Ne’e mak ohin ami lori fali ami atubele simu fixa pagamentu,” nia dehan.
Hatán ba preokupasaun benefisiáriu ne’e, Ministru Asuntu Kombatente Libertasaun Nasionál, Gil da Costa Monteiro “Oan-Soru”, dehan se benefisiáriu hosi Ainaru ka munisípiu seluk mak mai simu fixa pagamentu ne’e ekipa tékniku sei atende hotu.
“Ami la haruka sira atu fila, maibé ami sei atende hotu sira. Ha’u ko’alia hanesan ne’e, tanba faze dahuluk ami atende benefisiáriu hamutuk 800-resin. Enkuantu, agora Aileu ema iha de’it 210, entaun ami bele atende hotu sira,” nia esklarese.
Jornalista: Osória Marques
Editór: Xisto Freitas da Piedade
