DILI, 27 Abríl 2026 (TATOLI) – Ministra Edukasaun, Dulce de Jesus Soares, hamutuk ho Komisaun Organizadora, informa Prezidente Repúblika, José Ramos-Horta, kona-ba partisipasaun Timor-Leste sei lidera Reuniaun da-XIV ba Ministru Edukasaun Komunidade País Ko’alia Lian Portugés (CPLP, sigla portugés), ne’ebé sei akontese entre loorn 04-07 fula- Maiu 2026.
Durante enkontru, ministra no Komisaun Organizadora aborda mós preparativu sira ba realizasaun eventu ne’e iha Timor-Leste.
“Ami mai atualiza informasaun ne’e ba Prezidente Repúblika aumezmu tempu atu husu hodi fó mensajen kona-ba reuniaun ne’e”, Dulce de Jesus Soares, hateten ba jornalista sira iha Palásiu Prezidensiál Bairu Pité, Dili.
Tuir governante, atividade ne’e sei hala’o iha loron 04 Maiu, ho serimónia abertura, tuirmai reuniaun no semináriu internasionál ida kona-ba alimentasaun eskolár, ne’ebé konta ho partisipasaun peritu sira husi membru CPLP, ne’ebé selesionadu husi Sekretariadu organizasaun nian.
Iha loron 05 Maiu, sei iha komemorasaun boot Loron Internasionál Língua Portugeza, hamutuk ho selebrasaun Loron Kultura CPLP. Iha 06 Maiu, kontinua ho enkontru pontu fokál edukasaun CPLP nian no iha loron 07, reuniaun Ministru Edukasaun CPLP.
“Tema ne’ebé ita foti iha atividade ne’e mak ‘Edukasaun, Valór Demokrátiku Sira no Partisipasaun Sívika: Dalan Sira atu Hametin Sosiedade CPLP’. Tema ida-ne’e mak hili husi Ministériu Edukasaun no hetan aprovasaun husi Sekretariadu CPLP, nomós Konsellu Ministru”, nia informa.
Tuir ministra, tema referidu la’ós de’it reflete ba realidade Timor-Leste, maibé mós nasaun CPLP hothotu, razaun ne’e maka Sekretariadu mós konkorda ho atividade ida-ne’e.
Dulce mós subliña katak definisaun tema no ajenda rezulta husi prosesu konjuntu, envolve pontu fokál nasaun membru, no la’ós de’it Ministériu Edukasaun Timor-Leste mak deside mesak.
Nia subliña durante atividade reuniaun Ministru Edukasaun CPLP Prezidente Repúblika la partisipa maibé Prezidente Repúblika disponível ho nia tempu hodi partisipa iha sesaun solene iha loron 05 Maiu nian ba komemorasaun loron internasionál lian portugéza CPLP nian.
Relativamente ba partisipasaun Xefe Estadu, Ramos-Horta sei lamarka prezensa iha atividade hotu, maibé manifesta nia disponibilidade atu partisipa iha sesaun solene iha 05 Maiu, iha ámbitu selebrasaun Loron Mundiál Língua Portugeza.
Notisía relevante: KM aprova tema ba sorumutu Ministru Kultura CPLP ba da-XIV iha Timor-Leste
Jornalista: Arminda Fonseca
Editora: Maria Auxiliadora
