DILI, 28 Abríl 2026 (TATOLI)—Diretór Servisu Asisténsia Klínika iha HNGV, Eligio A.de A. Soares, hateten Diretór Servsiu Saúde Bobonaru, Gil Bernardo Vicente, mate iha HNGV ho moras kankru aten.
“Relasiona ho Diretór Servisu Saúde Munisípiu Bobonaru nia moras End-stage hepatocellular End-stage (kankru aten) ne’ebé baixa iha HNGV husi ekipa okolojia aprezenta moras ne’e ba iha juntamédika no konsegue transporta ba iha nasaun Malázia iha loron 13 fulan-Abríl,” Eligio A.de A. Soares hateten ba jornalista sira iha nia kna’ar fatin HNGV, ohin.
Nia informa, to’o iha Malazia ne’eba ekipamentu modernu no deteta katak ninia moras ne’e stadiun ne’ebé avansadu ona.
“Entaun sira iha Malázia mos hiit liman ona no haruka fila-fali mai iha loron 17 fulan-Abríl ita mai tratamentu hanesan kuidadu paliativu. Kuidadu iha sala VIP to’o ohin nia hakotu vida iha oras dadeersan no ninia kondisaun ne’ebé mak iha,” nia esplika.
Entertantu, Diretór Servisu Saúde Munisípiu Bobonaro hakotu iis husik hela feen no oan na’in-tolu (3) ne’ebé kompostu husi mane ida (1) no feto rua (2).
Jornalista : Felicidade Ximenes
Editór : Cancio Ximenes
