Ekipa operasionál halo kontrolu ba sirkulasaun manu-fuik iha aeroportu Komoro
DILI, 28 Abríl 2026 (TATOLI)—Administrasaun Aeroportu no Navegasaun Aérea Timor-Leste, Empreza Públika (ANATL, E.P, sigla portugés) liuhusi ekipa operasionál aeroportuária kontinua halo kontrolu ba serkiluasaun manu-fuik iha área Aeroportu Internasionál Nicolau Lobato Komoro.
Vogál II ba Asuntu Operasionál Aeroportuáriu, Marco de Sousa, hateten mitigasaun ne’ebé daudaun ne’e sira halo molok aviaun atu atera (landing) ekipa ground sira halo kontrolu iha pista 08 no pista 26, inklui mós apoiu husi UPF ne’ebé destaka ba aeroportu hodi halo kontrolu másimu ba manu-fuik atu labele fó impaktu ba movimentasaun aviaun.
Ekipa operasionál aeroportu ne’ebé halo kontrolosaun (on duty) ba pista aeroportu hamutuk na’in-ualu (8), enkuantu atividade kontrolu bazeia ba oráriu movimentasaun aviaun atu atrajen no semo, bainhira aviaun lahalo movimentasaun ekipa lahalo kontrolu.
“Animál ne’ebé halo sirkulasaun ba-mai iha aeroportu ne’e mak manu makikit, durante ami-nia kontrolasaun UPF tiru ona makikit rua bainhira semo iha área pista nian, entaun ami-nia esforsu mak nune’e ona. Tanba manu sira-ne’e mós fuik no naturalmente, tanba ita duni tiha sira, la kle’ur semo mai fali,” Dirijente ne’e relata ba Agência Tatoli iha aeroportu Komoro, ohin.
Maske nune’e, nia dehan, durante ne’e sira halo ona alarma maibé labele entaun meiu ne’ebé di’ak mak sira tenke tiru, tanba ida-ne’e perigu ba aviaun. Bainhira informasaun husi torre kontrolu katak aviaun ida atu atera (landing) mak manu-fuik kontinua semo, sira sei komunika ho pilótu hodi kansela atera ka sirkula (go around) ba-mai lai, hafoin sira asegura ona manu-fuik foin aviaun bele atera iha pista.
“Tanba bainhira manu-fuik sira-ne’e mak semo tama ba aviaun nia mákina ne’e perigu bele akontese ahi han mákina aviaun nian (Engine fire). Nune’e, ami planeia atu monta alarma (sirene) duni manu-fuik nian no sosa arma (kilat) tiru manu-fuik hodi reforsa tan iha terrenu atu garante seguransa iha aeroportu laran, tanba problema ne’e kada tinan tuir tempu makikit nian,” nia esplika.
Nia hatutan, dalabarak manu-fuik sira soke aviaun maibé seidauk to’o kondisaun ida grave, maibé sira nafatin buka alternativa hodi evita insidente boot iha aeroportu tanba atu salva pasajeiru sira.
Jornalista : Alexandra da Costa
Editór : Cancio Ximenes
