PR fó apoiu alimentár ba família vítima inundasaun iha Suai Loro

KOVALIMA, 28 Abril 2026 (TATOLI) – Prezidente Repúblika (PR), José Ramos-Horta, hamutuk ho Sekretáriu Estadu Protesaun Sivíl, Domingos Mariano Reis, ohin distribui bens primeira nesesidade ba família vítima 25 ne’ebé afetada ba inundasaun ne’ebé akontese, iha loron 25 no 26 Abril, iha Suku Suai Loro, Postu Administrativu Suai, Munisípiu Kovalima.

Xefe Estadu iha nia intervensaun hatete, bainhira rona informasaun kona-ba inundasaun ne’e, iha Suai, nia foti kedas desizaun hodi halo viajen ba munisípiu referidu hodi haree besik situasaun no fó apoiu emerjénsia.

“Sasan oituan de’it, maibé ha’u husu autoridade komunitaria hatene ka rona família ka uma kain ruma sofre halo kedas kontaktu ba Gabinete Prezidénsia Repúblika hodi fó ajuda lalais. Labele husik família-ida ka uma kain-ida hamlaha [no] hela iha uma ké aat los,” PR informa ba komunidade sira iha sede suku Suai Loro, Tersa ne’e.

“Buat [apoiu] ne’e ki’ik, Governu halo planu ba buat boot sira hanesan estrada no buat oioin. Entaun Prezidénsia bele halo buat ki’ik sira ne’e. Bainhira ha’u simu informasaun, ohin kedas ha’u asina [aprova] no semana ida nia laran orsamentu iha ona. Maibé, ida ne’e ba buat ki’ik sira ka urjénsia,”, nia akresenta.

Iha fatin hanesan, Sekretáriu Estadu Protesaun Sivil hatete Governu, liuhusi sekretariadu ne’ebé nia lidera iha misaun boot atu serví no proteje sidadaun sira husi kauza dezastre no katástrofe.

“Ami-nia misaun mak prepara resposta no rekupera ba vítima sira kauza husi dezastre naturál. Apoiu emerjénsia ne’ebé ami bele halo mak fó ka distribui ai-han no mos laos ai-han, inklui halo levantamentu dadus hodi verifika família ka uma kain hira mak vitima ba inundasaun, hodi nune’e bele hatene nível estragus (Grave, kmaan no naton),”nia hatete.

Governante ne’e haktuir, bainhira simu informasaun katak iha Suai akontese udan boot no hamosu inundasaun iha loron tolu liu ba, nia orienta kedas Servisu Protesaun Sivíl Munisipál, hamutuk ho autoridade lokál no joven sira atu muda komunidade afetadu sira husi fatin risku ba fatin seguru.

Xefe Suku Suai Loro, Manuel Gomes da Costa, hatete dadus vítima inudasaun ne’e sei provizóriu, tanba seidauk halo rekollamentu dadus ba família afetadu sira.

“Ida ne’e [dadus] provizóriu de’it tanba atu responde ba vizita Prezidente nian. Ami sei halo hela levantamentu dadus finál, tanba ami iha aldeia lima, maibé afetadu liu mak aldeia Loro, Akar Laran no Mane Ikun”, nia dehan.

Xefe Suku ne’e agradese ba prezensa PR nian, maske kolen no preokupa ho servisu Estadu nian, maibé sei buka tempu hodi vizita komunidade sira ne’ebé afetadu ba inundasaun.

Hafoin fahe nesesidade bázika ne’e, PR ho komitiva halo kedas viajen ba Postu Administrativu Maubisse, Munisípiu Ainaro hodi lori programa televiziva, Horta Show.

 Notísia relevante: Xefe Estadu hetan konvite partisipa Simeira Oseanu Melanéziu iha Papua Nova-Giné 

Jornalista: Afonso do Rosário

Editora: Isaura Lemos de Deus