BOBONARU, 29 Abríl 2026 (TATOLI) – Servisu Saúde Munisípiu Bobonaru lakon líder importante ida, Diretór Servisu Munisipál Saúde, Gil Bernardo Vicente, ne’ebé hakotu ona iis iha tempu ne’ebé la espera, husik hela instituisaun no komunidade iha tristeza nia laran.
Diretór Interinu Saúde Bobonaru, Sabino Viegas Cunha, dehan katak lakon ida-ne’e halo funsionariu sira triste tebetebes. Nia hateten katak durante tempu naruk servisu hamutuk, relasaun entre sira la’ós de’it hanesan kolega serbisu, maibé mós hanesan família ida.
Notísia relevante: Diretór Servisu Saúde Bobonaru Gil Bernardo hakotu iis iha HNGV
“Situasaun ne’ebé ami la espera. Ami triste tebetebes, ami-nia hamutuk tempu naruk, ami hamutuk barak liu duké família sira. Tanba ne’e, ami hato’o kondolénsia ba família maktoban maun Gil Bernardo Vicente ne’ebé mak husik hela ami”, Sabino espresa sentimentu ho matan-been bainhira matebian vizita serbisu fatin ba dala ikus nian, iha tersa ne’e.
Sabino subliña katak kontribuisaun no esperiénsia ne’ebé matebian fó durante ne’e sei sai hanesan gia ida ba funsionáriu sira atu kontinua.
Sekretáriu Autoridade Munisípiu Bobonaru ba Asuntu Administrasaun no Finansa, Domingos da Costa, mós hato’o katak perda ida-ne’e la espera no halo ema hotu hakfodak.
“Ita la espera katak diretór bele husik hela ami. Ohin ita fahe-malu tanba Na’i Nia hakarak. Ami hotu nia orasaun akompaña diretór, maun alin, Gíl nune’e bele hetan fatin deskansa hakmatek iha Na’i Nia kadunan Santu”, nia hato’o.
Diretór-Ezekutivu Ospitál Referénsia Maliana, José Marçal da Cruz, hateten katak falesimentu Gil Bernardo Vicente signifika lakon boot ba setór saúde iha Bobonaru, tanba nia hanesan enfermeiru ida ne’ebé dedika an atu serbí komunidade.
“Ami lakon enfermeiru di’ak ida ne’ebé serbí rai no povu Bobonaru. Adeus no obrigadu barak ba ita-nia serbisu no dedikasaun” nia hateten.
Durante asume kargu, Gil Bernardo Vicente hatudu kompromisu no lideransa forte iha dezenvolvimentu servisu saúde munisipál. Nia kontribuisaun sei nafatin lembra husi kolega serbisu no komunidade iha Bobonaru.
Matebian hakotu iis ho idade 54 iha HNGV, iha loron 28 Abríl, tanba sofre moras kankru aten. Maktoban husik hela feen no oan na’in-tolu, mane ida no feto rua (2).
Notísia relevante: Diretór Servisu Saúde Bobonaru Gil Bernardo hakotu iis iha HNGV
Jornalista: Sergio da Cruz
Editora: Maria Auxiliadora
