DILI, 29 Abríl 2026 (TATOLI) – Diresaun Nasionál Apoiu Dezenvolvimentu Mikro, Pekena no Média Empreza, Ministériu Komérsiu no Indústria (MKI), entre 2021 no 2025, tulun ona empreza 420 ne’ebé sai benefisiária ba Programa Kompetisaun Negósiu Inovadór (KNI) ho osan hamutuk millaun $1,8.
Diretór Nasionál Apoiu Dezenvolvimentu Mikro, Pekena no Média no Empreza, Reinaldo Borges, hateten benefisiáriu sira ne’ebé mai ho ideia inovadora iha área karpintaria, agrikultura, negósiu, no seluk tan.
“Sira-nia atividade daudaun la’o di’ak tebes. Ita kontinua monitoriza no buka merkadu ba sira, nune’e produtu sira ne’ebé iha asesu ba merkadu”, Reinaldo Borges hateten ba Tatoli iha Mandarin, ohin.
Nia esplika katak KNI 2025 ne’e iha empreza hamutuk 398 mak kompete, ikusmai 42 mak liu no sira-nia osan ministériu foin halo tranferénsia iha Janeiru 2026 hodi kompra ekipamentu sira no hein Governu tau sticker.
Programa KNI tinan ne’e la kontinua, tanba ministériu hetan redusaun iha orsamentu no bainhira iha orsamentu ratifikativu bele kontinua programa ne’e, tanba fó benefísiu ba Mikro, Pekena, no Média Empreza sira.
“Ho apoiu sira ne’e bele haboot negósiu ka atividade empreza mikro no pekena sira, hodi kontribui ba ekonomia família no nasaun nian, liuliu oinsá bele kompete iha merkadu, tanba sira ne’ebé hetan ona apoiu, sira-nia produtu barak mak daudaun fa’an ona iha merkadu nasionál, liuliu kafé-uut, jus no seluk tan”, nia informa.
Reinaldo Borges husu ba empreza ki’ik ne’ebé MKI tulun ona atu nafatin utiliza osan sira ne’e ho di’ak, nune’e bele hasa’e ekonomia família no kompete iha merkadu lokál, nasionál, inklui mós internasionál tanba Timor-Leste sai ona membru ASEAN.
Jornalista: Arminda Fonseca
Editora: Maria Auxiliadora
