OEKUSI, 30 Abríl 2026 (TATOLI) – Organizasaun Internasionál CARE, kinta ne’e realiza diálogu nível munisipál iha Rejiaun Administrativa Espesiál Oekusi Ambeno (RAEOA), hodi hametin responsabilidade sosiál no kolaborasaun atu hadi’a prestasaun serbisu públiku.
Diálogu ne’e ho tema prinsipál maka toka ba asuntu prioritáriu ne’ebé identifikadu liuhusi prosesu Kartaun Valór Komunidade (KVK), inklui má-nutrisaun labarik no inan-feto, seguransa ai-han, dezigualdade jéneru iha asesu ba serbisu, no preparasaun dezastre naturál, hanesan inundasaun,deslizamentu rai no seka, ne’ebé afeta komunidade sira iha RAEOA ho proporsaun bo’otliu.
Notísia relevante:CARE kontinua implementa programa “Atensaun Proteina” ba eskola 65 iha Oekusi
Sekretária Rejionál Asuntu Sosiál no Organizasaun Komunitária, Merita Marques Lafo, reprezenta Prezidente Autoridade RAEOA, konsidera diálogu ne’e, importante tanba alvu ba suku sanolu mai husi sub-rejiaun Nítibe, Oésilo no Pássabe.
“Komunidade RAEOA persija tebes servisu públiku ne’ebé responde ba sira-nia nesesidade reál. Diálogu Rejionál ida-ne’e la’ós reuniãun deit – ne’e kompromisu. Rezultadu husi prosesu Kartaun Valór Komunidade hatudu lian auténtiku husi ita-nia povu, no ha’u bolu liña ministeriais no prestadór servisu hotu atu hamutuk suporta planu asaun ne’ebé ita kria ohin. Autoridade Rejional sei lidera ho ezemplu diak sira,” nia hateten iha abertura, hala’o iha salaun alfandega Palaban, ohin.
Iha biban ne’e, Diretora Programa CARE iha Timor-Leste, Marsaulina Pasaribu, esplika, diálogu ne’e realiza ho objetivu atu aprezenta dadus no evidénsia KVK konsolidadu husi suku sanolu iha sub-rejionál tolu, hodi bele promove diálogu konstrutivu kona-ba prioritária iha nutrisaun, saúde, no preparasaun dezastre.
Nune’e mós kria hamutuk Planu Asaun Rejional 2026 ne’ebé konkretu no bele implementa. Garante kompromisu públiku husi Autoridade Rejional no liña ministerial sira ba implementasaun no rekomendasaun.
Haforsa lian ba feto, joven no grupu vulneravel iha desizaun rejionál, kontribui evidénsia ba polítika lokál no nasionál kona-ba nutrisaun, redusaun risku dezastre no entrega serbisu públiku.
“Diálogu Rejionál ida ne’e hatudu podér ne’ebé bele akontese bainhira komunidade, governu, no sosiedade Sívil hamutuk iha evidénsia ne’ebé forte. Prosesu Kartaun Valor Komunidade haforsa ona ema barak nia lian iha RAEOA, ne’ebé ohin loron ami realiza sai asaun konkreta,” nia hateten.
Notísia relevante:CARE –ME abertura distribuisaun revista Lafaek edisaun dahuluk 2026 iha EBC Tula-Ika Oekusi
Nia informa, liuhusi diálogu ne’e, nia rezultadu ne’ebé espera maka relatóriu konsolidadu KVK ne’ebé kobre dadus husi suku sanolu, Planu Asaun Rejional 2026 ne’ebé válidadu ho akordu mutu husi stakeholder sira.
Kompromisu públiku dokumentadu husi autoridade rejionál no liña ministeriál sira, akta reuniaun, lista prezensa, no dokumentasaun fotográfika, infográfiku ka postér hodi komunika rezultadu ba komunidade sira, no relatóriu sínteze diálogu rejionál ba parseiru (stakeholder) nasionál.
Notísia relevante:CARE empeñada dezenvolve projetu Lafaek apoia setór edukasaun iha Timor-Leste
Entretantu, partisipa iha diálogu ne’e mai husi Autoridade RAEOA liuhusi serbisu edukasaun, saúde, agrikultura, komite redusaun risku dezastre inklui autoridade komunitária sira mai husi suku sanolu.
Suku Bobometo, Usitaqueno no suku Usitasa’e husi sub-rejiaun Oésilo, suku Malelat no Abani husi sub-rejiaun Pássabe, suku Bene-Ufe, Suni-Ufe, Lela-Ufe, Usitako no suku Ban-Afi mai husi sub-rejiaun Nítibe.
Jornalista: Abílio Elo Nini
Editór: Rafael Ximenes de A. Belo
