OEKUSI, 04 Fevereiru 2026 (TATOLI) – CARE hamutuk ho Ministériu Edukasaun (ME) akompaña hosi Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, kuarta ne’e, abertura distribuisaun revista Lafaek edisaun 01 tinan-2026 nian iha Eskola Bázika Sentrál (EBC, sigla portugés) Tula-Ika, iha suku Lifau sub-rejiaun Pante Makasasar.
Alfredo de Araújo, reprezenta Diretór Jerál Pré-Eskolár no Ensinu Báziku, nu’udar mós Ekipa Editoriál ba Revista Lafaek, hateten katak, ezisténsia revista Lafaek iha Timor-Leste integra ona iha kurríkulu Ministériu Edukasaun sai hanesan livru, hodi uza atu hasa’e estudante sira-nia koñesimentu kona-ba literasia no numerasia.
“Distribuisaun revista Lafaek ne’e, atu fasilita estudante sira, oinsá aprende, lee istória sira, puízia, kadi-kakutak aumenta literasia no numerasia, no apoia manorin sira uza atu hanorin tuir kurríkulu, ne’ebé estabelesidu husi Ministériu Edukasaun,” nia hateten iha EBD Tula-Ika, ohin.
Tuir nia, Ministériu Edukasaun nafatin apoia projetu Lafaek, tanba revista nia ezisténsia husi 2001 to’o ohin loron kompleta ona ba tinan-25, signifika ministériu nia kompromisu atu apoia sustentabilidade eziste mak to’o ohin, atu kontribui eleva kualidade dixiplina hotu, atu bele fornese ba estudante sira hodi aprende.
“Ohin ha’u observa direita estudante sira iha klase idak-idak. Ha’u haree sira-nia emosionál ba revista ne’e di’ak tebes, kuandu ita haruka sira lee, hot-hotu foti liman atu lee, ne’e espresaun emosionál hatudu katak, sira iha korajen hakarak aprende barak husi revista Lafaek,” nia orgullu.
Notísia relevante:Horta : Revista Lafaek sai edukasaun ekstra ba labarik no komunidade
Prezidente Autoridade RAEOA, Régio da Cruz Salu, konsidera revista Lafaek kontribui tebes atu ajuda programa alfabetizasaun iha oekusi, tanba tuir dadus sensu populasaun Oekusi iha 2022, hatudu 40% nível literasia analfabetizasaun aas iha territóriu nasionál.
“Ne’e hatudu katak, ita komitmentu boot atu hamutuk ho RAEOA iha área edukasaun, kona-ba kualidade ba oan sira iha eskola, esforsu kompromisu ne’e presiza kontinua, tanba ajuda programa alfabetizasaun ho dadus sensu populasaun Oekusi iha 2022, 40% nível literasia analfabetizasaun iha Oekusi bootliu iha Timor-Leste, tan ne’e revista Lafaek ho edisaun haat ne’e importante tanba revista Lafaek ne’e, nia konteúdu sira-ne’e, hanorin oan sira atu lee, no komprende rekoñese sentidu, objetivu husi aparesimentu karikatura ho istória ida, ka puízia ida-ne’ebé furak, kadi-kakutak no seluktan,” nia hateten.
Diretór EBC Tula-Ika, Domigos Nessi, apresia ho programa CARE, tanba revista Lafaek nesesáriu tebes no sai referénsia iha prosesu ensinu aprendizajen, tanba iha eskola manorin sira revista Lafaek hodi hanorin tuir kurríkulu, ne’ebé sai hanesan inter-dixiplinar.
“Ho revista Lafaek, hanesan dixiplina sira matématika, siénsia naturais no sosiál, língua portugeza, literasia tetun no mós edukasaun fízika, arte kultura, ami sempre uza revista Lafaek no la sees husi kurríkulu, ezemplu ami uza hanesan numerasia no literasia kona-ba puízia, istória sira no dezeñu, ida-ne’e mak benefísiu revista Lafaek iha ami-nia eskola. Tanba ne’e, ami husu ba programa CARE liu-liu revista Lafaek nian no husu mós ba Governu liuhusi Ministeriu Edukasaun atu kontinua prodús revista Lafaek ba eskola sira,” nia orgullu.
Notísia relevante:CARE-Nova Zelándia asina akordu: “Edukasaun forte, nasaun forte”
Entretantu, projetu Lafaek hetan apoiu fundu husi Governu Nova Zelándia, parseria ho Ministériu Edukasaun (ME) Timor-Leste. CARE hanesan organizasaun internasionál ba dezenvolvimentu no umanitariu ne’ebé serbisu iha Timor-Leste dezde 1994. Ho programa sira ne’ebé konsentra iha munisípiu hotu iha rai-laran, CARE serbisu hamutuk ho parseiru sira atu salva moris, halakon ki’ak, no atinje justisa sosiál.
Dezde 2001, projetu Lafaek sai hanesan intervensaun importante ida ba CARE ho nia parseiru xave sira. Projetu ne’e nia intervensaun to’o populasaun Timor-Leste ho númeru boot, liu-liu komunidade rurál sira, no projetu ne’e efetivamente promove literasia, numerasia, no dezenvovimentu, inklui mos promove igualdade jéneru. Projetu Lafaek fornese responde di’ak ba Timor-Leste nia kontestu dezenvolvimentu.
Notísia relevante:Feira livru iha Oé-Cusse abitua leitura no promove literasia
Tuir observasaun Ajénsia Tatoli,I.P, hafoin abertura distribuisaun revista Lafaek, ekipa sira hala’o vizita direta kona-ba oinsá utiliza revista sira ne’e, hodi hatudu istória impaktu husi lee na’in-sira husi Lafaek nian no vizita galeria kreatividade ida-ne’ebé prepara ona iha EBC Tula-Ika ne’e.
Liuhusi CARE, projetu Lafaek públika edisaun revista haat, dala tolu iha tinan ida, iha parséria ho Ministériu Edukasaun no programa asisténsia Governu Nova Zelándia nian mak hanesan:
- Lafaek ki’ik ho pájina 20, distribui ba kanorin sira iha pre-eskolár no kanorin sira iha klase 1 no 2
- Lafaek prima ho pájina 24, distribui ba estudante sira iha klase 3 to’o 6.
- Lafaek ba manorin ho pájina 16, distribui ba manorin pre-eskolár no eskola primária sira
- Lafaek ba komunidade ho pájina 24, distribui ba membru komunidade sira.
Jornalista: Abílio Elo Nini
Editór: Rafael Ximenes de A. Belo
