iklan

EDUKASAUN, ERMERA, HEADLINE

CARE-Nova Zelándia asina akordu: “Edukasaun forte, nasaun forte”

CARE-Nova Zelándia asina akordu: “Edukasaun forte, nasaun forte”

TARAÇO, 29 juñu 2022 (TATOLI)- Governu Nova Zelándia liuhusi nia embaixada iha Dili mantein kompromisu hodi kontinua apoiu CARE Internasionál iha Timor-Leste hodi extende tan programa Revista Lafaek.

Tanba ne’e, CARE Internasionál reprezenta husi Country diretor, Peter Goodfellow reprezentante Embaixadór Nova Zelándia, Joanna kempers, nu’udar Global development and scholarship division manager, asina akordu hodi estende tan kooperasaun hahú husi 2022 to’o 2027, iha Eskola báziku filiál Taraço, postu administrativu Railaco, munisípiu Ermera, kuarta ne’e.

“Ami hakarak suport Revista Lafaek tinan lima mai tan tanba importante tebes ba labarik-sira bele iha oportunidade atu le’e iha eskola nune’e mós iha uma, tanba ita hatene katak baihira edukasaun forte mak nasaun mós sei forte. Tanba ne’e, ami kontinua apoia tan orsamentu millaun $ 7.5 ba tinan tinan lima mai,” Embaxaidór Nova Zelándia iha Timor-Leste, Philip Hewitt hateten, hafoin partisipa iha seremónia akordu estensaun koperasaun iha EBF Taraço.

Embaixadór Nova Zelándia iha Timor-Leste Philip Hewitt hateten Governu Nova Zelandés hatudu nafatin prontidaun apoiu CARE internasionál liuhusi programa Revista Lafaek tanba programa ne’e importante tebes ba labarik sira iha Timor-Leste atubele hasa’e koñesementu liuhusi aprende iha eskola no uma.

Diplomata Nova Zelandés ne’e relata ezisténsia Revista Lafaek iha Timor-Leste tinan rua nulu ona no akordu ne’ebé halao daudaun governu Nova Zelándia apoiu orsamentu millaun $USD 24.9 hahú ona tinan 2005 no kontinua to’o tinan 2027

Nune’e mós Country diretor CARE Pitter Goodfeloow haktuirdurante tinan 20 ezisténsia Revista Lafaek to’o ohin loron konsege atribui ona revista ho tipu oin haat iha teritórriu laran ba eskola públiku no privadu.

Nune’e ho akordu extensaun ne’e sei reforsa di’ak liután serbisu ekipa Lafaek hodi mellora produsaun sira iha numerasia no literasia hodi hasae koñesementu labarik sira nian liuhusi mós media sosiál no kanál Youtube.

“Ohin ami prepara ona no asina akordu hodi halo estensaun ba tinan lima tan, oportunidade ida ne’e ekipa Revista Lafaek sei aumenta liután servisu ka programa importante sira ba labarik no inan aman sira, liuhusi mós plataforma media sosiál sira.

Daudaun ne’e tipu produsaun Lafaek iha oin haat mak hanesan Lafaek ki’ik ba eskola báziku 1 no 2 ano Lafaek prima ba 3 to 6 ano Lafaek ba komunidade ba uma-kain sira/Lafaek plataforma online ba Facebook no Youtube.

Revista Lafaek sai edukasaun ekstra

Programa Revista Lafaek ne’ebé ekipa CARE internasionál prodús iha Timor-Leste hodi distribui ba eskola privadu no públiku sira iha territóriu hanesan edukasaun ekstra ida ba labarik no komunidade tanba maioria labarik sira iha Timor-Leste seidauk asesu ba leitura sira nune’e Revista Lafaek importante tebes hodi fasilita labarik sira aprende di’ak liután.

“Seremónia asinatura estensaun koperasaun governu Nova Zelándia no CARE kona-ba projetu Revista Lafaek tinan lima tan. Ida ne’e, importante tebes tanba ita hatene Revista Lafaek iha edisaun haat; balun ba labarik no komunide ida ne’e hanesan edukasaun ekstra ba labarik no komunidade nune’e bele kria abitu leitura,” Prezidente repúblika hateten Hafoin partisipa no testamuña serimónia asinatura akordu estensaun.

Iha fatin hanesan, Ministru edukasaun juventude no desportu (MEJD), Armindo Maia, relembra katak Revista Lafaek ne’e mosu iha primeiru Governu konstitusionál iha mandatu nu’udar ministru iha tempu ne’ebá no ohin loron eziste tinan rua nulu ona.

“Ezisténsia Revista Lafaek útil duni tanba konteúdu sira serve duni ba labarik sira hodi aprende no mós ba mestre sira hanorin iha atividade létiva sira,” nia hateten

Ezekutivu ne’e relata katak tuir peskiza ne’ebé hala’o husi early grade reading assessment ka EGRA iha tinan 2017 no 2018 hatudu kapasidade labarik sira nian ba le’e ne ki’ik tebes.

Nune’e ho Revista Lafaek ne’ebé prodús husi CARE/ konsege eleva labarik sira-nia leitura husi 5% ate 10%.

Revista Lafaek iha tipu haat mak distribui ba eskola no komunidade

  1. Lafaek ki’ik fahe ba kada kanorin hotu iha edukasaun pré-eskolár no ensinu báziku klase 1o no 2o ano iha Timór laran tomak. Ninia kontéudu foka liubá dezenvolvimentu literasia no numerasia báziku, abilidade motóriku, lojiku, saúde, ijiene, liuhusi dalan atratívu tuir mundu labarik nian. Revista Lafaek ki’ik fahe ona ba kanorin 109.000 iha territóriu Timor laran tomak.
  2. Lafaek Prima fahe ba hanorin hotu iha ensinu báziku klase 3 o to’o 6o iha Timór laran tomak ninia konteúdu foka liu ba dezenvolvimentu literasia no numerasia avansadu no introdusaun báziku kona-ba siénsia sira nomós introdusaun ba lian portugés, revista ne’e fahe ba kanorin 135.000 iha territóriu Timór laran tomak.
  3. Lafaek ba manorin fahe ba kada manorin hotu iha edukasaun pré-eskolár no ensinu báziku klase 1 o 6o. Ninia konteúdu foka ba iha metodolójia hanorin ne’ebé sentradu ba iha kanorin-sira no mós sai hanesan materiál didátiku ne’ebé apoia kurríkulu nasionál Ministériu edukasaun juventude no desportu Timor-Leste. Revista nee fahe ba manorin 10.000 iha territóriu tomak.
  4. Lafaek ba komunidade fahe ba uma-kain sira iha área rurál no remota sira. Ninia kontéudu foka liu ba informasaun báziku sira kona-ba saúde, nutrisaun no ijiéne, agrikultura negosiu ki’ik, no kuidadu labarik hodi tulun harii no hadi’ak kondisaun ekonomia familia nian. Revista ne’e fahe ba uma-kain 792 iha área rurál no remota sira.
  5. Lafaek plataforma online (Facebook no website) objetivu hanesan plataforma ida atu prepara joven sira hodi involve aan, hato’o sira-nia asuntu ka kestaun no buka solusaun. Plataforma ida ne’e ho objetivu atu promove governasaun inkluziva ba foinsa’e sira-nia partisipasaun nu’udar sidadaun. Agora daudaun pájina Facebook Lafaek hetan ona followers hamutuk liuhusi 148.000.

Entretantu, partisipa iha eventu asina akordu estensaun entre CARE internasionál iha Dili no Governu Nova Zelándia mak Prezidente repúblika José Ramos Horta no Ministériu edukasaun juventude no desportu Armindo Maia, autoridade lokál komunidade inklui estudante sira.

Jornalista: Anito Soares

Editór: Rafy Belo

iklan
iklan

Leave a Reply

iklan
error: Content is protected !!