DILI, 30 Abríl 2026 (TATOLI) – Iha ámbitu komemorasaun Loron Mundiál Traballadór, iha 01 Maiu kada tinan, Prezidente Kámara Komérsiu no Indústria Timor-Leste (CCI-TL, sigla portugés), Jorge Serrano, felisita traballadór timoroan sira, tantu iha rai-laran komu iha rai-li’ur.
Jorge Serrano afirma katak dezenvolvimentu kualker nasaun depende ba nia traballadór sira. Nune’e, data ne’e importante hodi fó onra ba traballadór sira nu’udar eroi ba dezenvolvimentu nasionál, nomós reflete kona-ba direitu traballadór, luta ba kondisaun serbisu di’ak, no valoriza sira-nia kontribuisaun ba ekonomia.
“Laiha traballadór sira sei laiha empreza, laiha traballadór, laiha dezenvolvimentu. Nasaun ida forte, nasaun ida boot, tanba traballadór sira-nia kontribuisaun. Empreza ida boot, empreza ida forte, tanba traballadór sira-nia kontribuisaun”, Jorge Serrano afirma iha Akait, ohin.
Responável ne’e subliña katak maski ohin loron iha avansu teknolójiku no ema komesa uza mákina, maibé seidauk substitui ema tanba ema serbisu ho ulun no fuan.
“Ida-ne’e ita tenke kongratula traballadór hothotu ninia kontribuisaun. Se ohin loron Timor-Leste la’o iha progresu ida, tanba kontribuisaun husi hothotu nian, liuliu traballadór sira. Ema barak hakarak serbisu, balun hakarak serbisu iha rai-laran, balun iha rai-li’ur, hothotu kontribui ba ita-nia dezenvolvimentu”, nia dehan.
Kestiona kona-ba saláriu mínimu, Jorge Serrano hateten CCI-TL mós hola parte iha Konsellu Nasionál Traballu no hato’o ona proposta no laaiha objesaun atu saláriu mínimu to’o entre $150 to’o $200.
“Ha’u ko’alia ona ho maluk emprezáriu sira katak laiha problema ba saláriu mínimu. Agora, presiza mak haree ba Lei Laborál atu ajusta buat balun, atualiza tuir situasaun balun atu direitu empregadór nian ho direitu traballadór labele ida sai fali vítima”, nia dehan.
Dirijente ne’e defende katak kontinua diskute hela atu ajusta katak tenke atualiza ona lei laborál ho forma adekuada.
“Ha’u husu mós ba emprezáriu sira atu labele halo esplorasaun ba traballadór sira. Ita ko’alia traballadór dignu, ita mós tenke haree sira-nia oras serbisu, oras deskansa. Signifika sira. Tanba ha’u dehan beibeik traballadór ne’e asset ida empreza nian, ita tenke konta sira”, nia afirma.
Jornalista: Arminda Fonseca
Editora: Maria Auxiliadora
