DILI, 01 Maiu 2026 (TATOLI) – Autoridade Aduaneira (AA/Alfándega), iha trimestre dahuluk 2026, arrekada reseita hamutuk millaun $25 ba kofre Estadu.
Komisáriu AA, Joanico Pinto, hateten reseita sira ne’e maihusi taxa ba impostu, sobre venda, seletivu konsumu no seluk tan.
Reseita husi millaun $25 ne’e kontribui husi pontu entrada Batugadé-Bobonaru hamutuk $522.617,01, postu atendimentu Tunubibi-Bobonaru $210,63, postu integradu Oesilu-Oekusi $4.176,08, postu integradu Sakato-Oekusi $41.838,57, Aeroportu Suai-Kovalima $8.009,62, no postu integradu Salele $162.134,06.
Aleinde ne’e, Aeroportu Dili rekolla $366.594,51, Portu Tíbar $23.627.453,23, no Post Office (Edifísiu Korreiu) hamutuk $8.166,41.
“Totál sira-ne’e hotu ita hetan $24.742.996,12. Husi reseita sira ne’e, kada tinan kontribui barak liu mak husi Portu Tíbar”, Joanico Pinto informa ba Tatoli.
Lembra katak Governu introdús impostu seletivu konsumu foun, kompostu hosi 10% ba karreta ho valór liu rihun $10, 20% ba karreta ho valór liu rihun $25, 30% ba veíkulu ho valór liu rihun $550. Aumenta iha impostu konsumu tabaku ho produtu tabaku seluk hosi $50 kada kilograma sa’e ba $100, impostu konsumu foun $1 kada kilograma ba masin-midar, introdusaun impostu konsumu foun ho valór $3 kada litru ba bebida asukarada (fanta, coca-cola, sunkist, sprite no seluk tan).
Aleinde ne’e, hasa’e impostu ba importasaun husi 2,5% ba 5%, ne’ebé ho introdusaun impostu hirak ne’e tuir projesaun reseita doméstika sa’e to’o millaun $174,9 iha tinan 2023. Introdusaun impostu hirak ne’e mós hodi hasa’e kolesaun reseita minerál nu’udar instrumentu fiskál ne’ebé Governu uza hodi redús dependénsia ba Fundu Mina-rai.
Jornalista: Arminda Fonseca
Editora: Maria Auxiliadora
