DILI 03 Maiu 2026 (TATOLI) – Asosiasaun jornalista sira, Timor-Leste Press Union (TLPU) no Uniaun Profisionál Jornalista Timor-Leste (UPJTL), kongratula jornalista sira iha okaziaun Loron Mundiál Liberdade Imprensa, ne’ebé selebra kada tinan iha 03 Maiu.
Iha selebrasaun data ne’e, asosiasaun sira destaka mós liberdade imprensa no moris di’ak ka bem-estar ba jornalista sira.
Sekretáriu-Jerál TLPU, Zezito da Silva, parabeniza jornalista sira iha mundu ne’ebé hala’o knaar profisionál hodi fornese informasaun ba sosiedade loroloron.
“Loron ida ohin hanesan loron espesiál ba jornalista sira. Loron 03 Maiu, kada tinan, ita selebra Loron Mundiál ba Liberdade Imprensa, loron ne’e importante tebes ba jornalista hotu, ba ema hotu, tanba jornalista hanesan parseiru importante atu fó informasaun ba públiku no sai ponte entre sosiedade no Governu”, Zezito hateten ohin via telefone.
Nia mós husu atu halo momentu silénsiu ida hodi hanoin hikas jornalista sira ne’ebé lakon vida bainhira hala’o knaar iha área konflitu.
“Ba jornalista sira iha Timor-Leste ha’u nia parabéns dala ida tan ba ita-boot sira tanba durante ne’e ita-boot sira halo knaar di’ak tebes oinsá atu serbí públiku ho informasaun”, nia hato’o.
Zezito realsa katak rangking liberdade imprensa Timor-Leste, iha tinan ne’e mellora iha nivel mundiál, uluk iha pozisaun 39 tun ba 30, ne’ebé hatudu sinál pozitivu ba dezenvolvimentu setór mídia. “Jornalista sira nafatin serbisu ho profisionál, labele iha intervensaun, labele iha limitasaun husi podér polítiku no podér ekonómiku sira”, nia dehan.
Nia husu ba sosiedade atu respeita jornalista sira no fó espasu ba sira hala’o knaar ho di’ak atu serbí públiku ho informasaun. Solisita mós ba mídia-na’in no Governu atu fó atensaun ba bem-estar jornalista sira.
“Na’in ba mídia sira, Konsellu Imprensa sira mós tenke haree ona asuntu sira ne’e, tanba pontu ida-ne’e importante ba bem-estar jornalista sira-nian. Jornalista sira barak mak nia saláriu ne’e sei ki’ik”, nia afirma.
Iha biban ne’e, Sekretáriu-Jerál TLPU hateten katak mídia ida agora ne’e tama ona iha era dijitál, nune’e jornalista sira presiza adapta no aprende mós buat barak husi ne’ebá.
Kona-ba independénsia editoriál, Zezito salienta katak to’o agora TLPU seidauk simu keixa formál ruma husi jornalista ka husi na’in ba mídia sira mak hetan kazu ida-ne’e. “Karik jornalista ka mídia sira ne’ebé hetan impedimentu ruma husi podér polítiku ou ekonómiku sira, presiza informa diretamente mai asosiasaun sira para hatene”, nia dehan.
Iha parte seluk, Vise-Prezidente Asuntu Administrasaun no Finansa UPJTL, Roni Silva hateten katak Loron Liberdade Imprensa importante tebtebes ba jornalista timoroan hothotu.
“Tinan-tinan ita sempre selebra iha 03 Maiu ne’e hodi fó hanoin ba ita katak oinsá ita halo ita-nia serbisu sira ho profisionál nafatin. Loron ida-ne’e fó hanoin ba ita atu serbisu tuir Lei Komunikasaun Sosiál”, nia dehan.
Nia mós destaka importánsia kona-ba independénsia editoriál no husu atu redasaun sira halo serbisu ho objetividade. “Ita hakarak halo redasaun ne’e independente loloos ne’e labele kahur sasán. Ita labele dehan gosta ida-ne’e, gosta ida ne’ebá, entaun ita halo notísia ne’e ladún di’ak”, nia realsa.
Kona-ba saláriu, Roni Silva husu ba Governu atu revee polítika subvensaun ba mídia sira. Tanba atu kontribui jornalista sai profisionál, fatór ida importante mós mak bem-estar.
“Liuliu ba Governu oinsá atu iha nia polítika ida haree filafali apoia subvensaun ba mídia. Subvensaun ne’ebé fó ba mídia ne’e bele ajuda saláriu ba kolega jornalista hothotu. Se la’e osan sira ne’e transfere, na’in ba kompañia mak benefisia de’it, jornalista nafatin ho salariu ida mínimu ne’e”, nia fó-hanoin.
Jornalista: Natalino Costa
Editora: Maria Auxiliadora
