DILI, 04 Maiu 2026 (TATOLI)-Deputada husi Bankada Kongresu Nasionál Rekonstrusaun Timorense (CNRT, sigla portugés), Cedelízia Faria dos Santos, louva serbisu jornalista timoroan sira hotu ne’ebé presta ba povu no nasaun.
Nia hato’o apresiasaun aas ne’e iha ámbitu komemorasaun Loron Mundiál Liberdade Imprensa, iha 03 Maiu, ne’ebé mundu tomak, inklui Timor-Leste selebra.
Deputada ne’e orgullu tanba relatóriu Reporters Without Borders (RSF) publika iha loron 30 fulan-Abríl 2026 hatudu Índise Liberdade Imprensa Mundiál tinan 2026, hatuur Timor-Leste (TL) okupa pozisaun 30 husi nasaun 180.
Tuir relatóriu ofisiál RSF, nasaun rejista progresu importante iha setór komunikasaun sosiál bainhira sa’e bá pozisaun 30 kompara ho 2025 iha posizaun 39.
Cedelízia parabeniza ba país no Governu Dasiak, espesialmente ba jornalista no mídia sira tanba rezultadu ne’e hatudu iha progresu no klasifikasaun ne’e país hetan aas liu iha Asosiasaun Nasaun Sudeste Aziátiku (ASEAN, sigla inglés).
“Ita tenke orgullu, tanba nasaun Timor-Leste dalabarak preokupa ita-nia mídia liberdade, maibé iha ASEAN, ita tama ba top, primeiru lugar. Ho ida-ne’e, hanesan reprezetante povu iha fuku ne’e hakarak fó parabéns ba jornalista timoroan tomak, orgullu ita-boot sira-nia kontribuisaun ba povu no nasaun, liuhusi serbisu no dedikasaun”, nia hato’o liuhusi intervensaun iha reuniaun plenária Parlamentu Nasionál, ohin.
Mariquita Soares, deputada husi Frente Revolusionária Timor-Leste Independente (FRRTILIN) husu ba Governu atu kontinua promove valór fundamentál imprensa nian bele livre.
Notísia relevante: Timor-Leste rejista progresu iha liberdade imprensa
Jornalista: Nelson de Sousa
Editora: Maria Auxiliadora
