BAUKAU, 05 Maiu 2026 (TATOLI)—Atividade regulár Programa Nasionál Dezenvolvimentu Suku (PNDS) iha Munisípiu Baukau tinan-ne’e hamutuk 78.
Diretór PNDS Munisípiu Baukau, Amaro Gusmão Gama Freitas, hateten husi projetu 78 ne’e kompostu husi 61 ba atividade regulár hanesan reabilitasaun estrada no kampu multifunsaun, enkuantu adisonál iha sanulu no hitu mak konstrusaun koziña (dapur) ba merenda eskolar.
Amaro relata, durante trimestrál dahuluk, PNDS hala’o preparativu hanesan estabelese estrutura PNDS ba suku foun tolu, selebra kontratu subvensaun públika, akordu implementasaun projetu, transferénsia fundu ba konta bankária suku, sosializasaun nivél postu, planeamentu no selesaun projetu.
Alende ne’e, aprovasaun lista prioridade iha nivel Asembleia Postu Administrativu (ASPA) no Konsellu Koordeansaun Munisipál (KKM) inklui survei dezeñu, mobilizasaun traballadór no aprovizionamentu ho kompaña fornesedór materiál.
“Suku 62 maiora projetu reabilitasaun estrada no kampu multifunsaun, enkuantu Eskola Bázika Sentrál (EBC) hamutuk hitu mak tinan-ne’e hetan projetu PNDS hodi konstrui dapur merenda eskolár ho tipu protipu hanesan EBC Soba, Makalaku, Triloka, Bukoli, Vemase Tasi, Maluru no Bahamori,” Amaro Freitas hateten iha Salaun Apuramentu Administrasaun Munisipál Vila Nova, Tersa ne’e.
PNDS Munisípiu Baukau inisiál tinan-ne’e hasoru dezafiu sira hanesan transferénsia orsamentu tarde, mudansa estrutura ofisiál suku, liña komunikasaun entre autoridade munisipál, postu no suku inklui aloksaun orsamentu operasionál ne’ebé la sufisiénte.
Entretantu, alokasaun orsamentu PNDS ba tinan-ne’e totál hamutuk $2.427.434,00, iha-ne’ebé aloka ba atividde regulár $1.975.499,00 no adisonál hamutuk sanulu $238.663,00 no dapur merenda eskolár hitu $213.272,00.
Jornalista: Natalino Belo
Editór: Xisto Freitas da Piedade
